സംസ്ഥാനത്ത് ചൂട് കൂടുന്നു; സുരക്ഷാ മുന്നറിയിപ്പുമായി ദുരന്തനിവാരണ സമിതി

തിരുവനന്തപുരം: സംസ്ഥാനത്ത് ചൂടു കൂടുന്നതോടെ സുരക്ഷാ മുന്നറിയിപ്പുമായി ദുരന്തനിവാരണ സമിതി. 35-37 ഡിഗ്രി സെല്‍ഷ്യസാണ് ഇപ്പോഴത്തെ ഉയര്‍ന്ന ശരാശരി താപനില. കോട്ടയം, കണ്ണൂര്‍, പുനലൂര്‍, ആലപ്പുഴ ജില്ലകളിലാണ്  ഉയര്‍ന്ന താപനില രേഖപ്പെടുത്തിയത്.

ഫെബ്രുവരി 23ന്  കൂടുതല്‍ ചൂട് രേഖപ്പെടുത്തിയത് കോട്ടയത്താണ് (37 ഡിഗ്രി സെല്‍ഷ്യസ്). 20ന് കോട്ടയം, കണ്ണൂര്‍ എന്നിവിടങ്ങളിലായിരുന്നു ഉയര്‍ന്ന താപനില (36). 14ന് പുനലൂര്‍ (35.5), 11ന് കോട്ടയം (36), 10ന് ആലപ്പുഴ (35.2) എന്നിങ്ങിനെയാണ് രാജ്യത്തെ ഉയര്‍ന്ന താപനില്.

സംസ്ഥാനത്തെ അന്തരീക്ഷതാപനില ക്രമാതീതമായി ഉയരുകയാണ്. ഈ മാസം അഞ്ചുദിവസങ്ങളില്‍ രാജ്യത്ത് ഏറ്റവുംകൂടുതല്‍ ചൂട് അനുഭവപ്പെട്ടത് കേരളത്തിലായിരുന്നു. ജനങ്ങള്‍ രാവിലെ 11 മുതല്‍ ഉച്ചയ്ക്ക് മൂന്നുവരെയുള്ള സമയത്ത് നേരിട്ട് സൂര്യപ്രകാശം ഏല്‍ക്കുന്നത് ഒഴിവാക്കണം, നിര്‍ജലീകരണം തടയാന്‍ കുടിവെള്ളം കരുതണം, പരമാവധി ശുദ്ധജലം കുടിക്കുക, ദാഹമില്ലെങ്കിലും വെള്ളം കുടിക്കുന്നതു തുടരുക.

നിര്‍ജലീകരണമുണ്ടാക്കുന്ന മദ്യം, കാപ്പി, ചായ, കാര്‍ബണേറ്റഡ് സോഫ്റ്റ് ഡ്രിങ്കുകള്‍ തുടങ്ങിയവ പകല്‍സമയത്ത് ഒഴിവാക്കണം. നട്ടുച്ചയ്ക്ക് പാചകത്തില്‍ ഏര്‍പ്പെടരുത്, പുറത്തേക്കിറങ്ങുമ്പോള്‍ കുടയോ തൊപ്പിയോ ഉപയോഗിക്കുക, അയഞ്ഞ, ഇളംനിറത്തിലുള്ള പരുത്തിവസ്ത്രങ്ങള്‍ ധരിക്കുക തുടങ്ങിയ നിര്‍ദേശങ്ങളാണു പുറപ്പെടുവിച്ചിരിക്കുന്നത്.