തെരഞ്ഞെടുപ്പ് പെരുമാറ്റ ചട്ടലംഘനം: യെദ്യൂരപ്പയ്ക്ക് കോടതിയുടെ സമന്‍സ്

ബംഗളൂരു: നിയമസഭാ ഉപതെരഞ്ഞെടുപ്പ് പ്രചാരണ വേളയില്‍ മാതൃകാ പെരുമാറ്റ ചട്ടം ലംഘിച്ചുവെന്നാരോപിച്ച് കര്‍ണാടക മുഖ്യമന്ത്രി ബി എസ് യെദ്യൂരപ്പയ്ക്ക് ഗോകക്ക് കോടതി സമന്‍സ് അയച്ചു. രണ്ട് തവണ പ്രതി പ്രത്യേക സമുദായത്തെ എടുത്തുപറഞ്ഞ് വോട്ട് അഭ്യര്‍ഥിച്ചുവെന്നും ഗോകക്ക് സ്ഥാനാര്‍ഥിക്ക് വേണ്ടി ജാതിയും മതവും പറഞ്ഞ് വോട്ട് അഭ്യര്‍ഥിച്ചത് പാര്‍ട്ടി പ്രവര്‍ത്തകരല്ലെന്നും ഫസ്റ്റ് ക്ലാസ് ജുഡീഷ്യല്‍ മജിസ്ട്രേറ്റ് പറഞ്ഞു.

കഴിഞ്ഞ നവംബര്‍ 23ന് ഗോകക്കില്‍ തെരഞ്ഞെടുപ്പ് റാലിയെ അഭിസംബോധന ചെയ്ത യദ്യൂരപ്പ, വീരശൈവ-ലിംഗായത്ത് സമുദായക്കാരോട് വോട്ട് വിഭജിക്കരുതെന്ന് അഭ്യര്‍ഥിച്ചിരുന്നു. രമേശ് ജാര്‍ക്കിഹോളിയെ പിന്തുണക്കണമെന്നും അഭ്യര്‍ഥിച്ചിരുന്നു. ഇതിനെ തുടര്‍ന്ന് ജാതി-മതത്തിന്റെ പേരില്‍ വോട്ട് അഭ്യര്‍ഥിച്ചെന്നും തെരഞ്ഞെടുപ്പ് കമ്മീഷന്റെ മാതൃകാ പെരുമാറ്റച്ചട്ടം ലംഘിച്ചുവെന്നും ചൂണ്ടിക്കാട്ടി കോണ്‍ഗ്രസും ജെഡിഎസും തെരഞ്ഞെടുപ്പ് കമ്മീഷന് പരാതി നല്‍കി. തുടര്‍ന്ന് യെദ്യൂരപ്പക്കെതിരെ കേസെടുക്കുകയായിരുന്നു.

അതേസമയം, സമന്‍സിനെതിരേ മുഖ്യമന്ത്രിയോ അദ്ദേഹത്തിന്റെ ഓഫീസോ ഇതുവരെ പ്രതികരിച്ചിട്ടില്ല.