ഓഹരി വിപണി വീണ്ടും റെക്കോഡ് സൃഷ്ടിച്ചു

മുംബൈ: ഓഹരി വിപണിയിലെ കുതിപ്പ് പുതിയ റെക്കോഡ് നിലവാരങ്ങളിലേക്ക് നീങ്ങുന്നതിന് വഴിയൊരുക്കി. കേന്ദ്രധനകാര്യമന്ത്രി നിര്‍മലാ സീതാരാമന്‍ അവതരിപ്പിച്ച ബജറ്റിനെ തുടര്‍ന്ന് തുടര്‍ച്ചയായ മൂന്നാമത്തെ ദിവസമാണ് ഓഹരികള്‍ കുതിച്ചു കയറുന്നത്.

കഴിഞ്ഞയാഴ്ചയുണ്ടായ നഷ്ടം മുഴുവനായി നികത്തിയ ഓഹരി വിപണി പുതിയ ഉയരങ്ങളിലേക്ക് നീങ്ങുന്നതാണ് ഇന്ന് കണ്ടത്. നിഫ്റ്റി ആദ്യമായി 14,800ന് മുകളിലേക്ക് ഉയരുന്നതിന് ഇന്ന് വിപണി സാക്ഷ്യം വഹിച്ചു. 14,868 പോയിന്റ് വരെ ഉയര്‍ന്ന നിഫ്റ്റി 14790ലാണ് ക്ലോസ് ചെയ്തത്.

സെന്‍സെക്സ് വീണ്ടും 50,000 പോയിന്റിന് മുകളിലേക്ക് ഉയര്‍ന്നു. 142 പോയിന്റാണ് നിഫ്റ്റിയില്‍ ഇന്നുണ്ടായ നേട്ടം. 458 പോയിന്റാണ് ഇന്ന് സെന്‍സെക്സ് ഉയര്‍ന്നത്. ബാങ്ക് നിഫ്റ്റി പുതിയ ഉയരങ്ങളിലേക്ക് നീങ്ങി. 34,908 പോയിന്റ് വരെ ഇന്ന് ബാങ്ക് നിഫ്റ്റി ഉയര്‍ന്നു. ഇന്ന് എല്ലാ മേഖലകളും നേട്ടം രേഖപ്പെടുത്തി.

ഫാര്‍മ മേഖലയാണ് ഏറ്റവും മികച്ച നേട്ടം രേഖപ്പെടുത്തിയത്. നിഫ്റ്റി ഫാര്‍മ സൂചിക 2.8 ശതമാനം ഉയര്‍ന്നു. പൊതുമേഖലാ ബാങ്ക് ഓഹരികളും മികച്ച നേട്ടം രേഖപ്പെടുത്തി. നിഫ്റ്റി പി എസ് യു ബാങ്ക് സൂചിക 2.8 ശതമാനം ഉയര്‍ന്നു. ഇന്‍ഡസ്ഇന്‍ഡ് ബാങ്കിന്റെ ഓഹരി വില 7 ശതമാനമാണ് ഇന്ന് ഉയര്‍ന്നത്. നിഫ്റ്റിയിലെ 50 ഓഹരികളില്‍ 40ഉം നേട്ടം രേഖപ്പെടുത്തി.