സ്വര്‍ണ്ണകടത്തുമായി ബന്ധപ്പെട്ട് എസ്.എസ് ജ്വല്ലറിയുടെ പേരില്‍‍ വന്ന വാര്‍ത്തകള്‍ വ്യാജമെന്ന് ജ്വല്ലറി അധികൃതര്‍

സ്വര്‍ണ്ണകടത്തുമായി ബന്ധപ്പെട്ട് എസ്.എസ് ജ്വല്ലറിയുടെ പേരില്‍‍ വന്ന വാര്‍ത്തകള്‍ വ്യാജമെന്ന് ജ്വല്ലറി ഉടമ എം.എ വാജിദ് ഓലപ്പീടിക അറിയിച്ചു. തങ്ങള്‍ക്ക് ഇതുമായി ബന്ധമില്ലെന്നും 2018 ‍‍ജനുവരി 28 ന് മണ്ണൂരിലെ എസ്.എസ് ഗോള്‍ഡ് ആന്‍ഡ് ഡയമണ്‍ഡ് ഷോ റൂം പാണക്കാട് ഹൈദരലി തങ്ങള്‍ ഉദ്ഘാടനം ചെയ്ത ഫോട്ടോ ഫേസ് ബുക്കില്‍ നിന്നെടുത്ത് ദുരുപയോഗപ്പെടുത്തുകയായിരുന്നുവെന്നും അധികൃതര്‍ അറിയിച്ചു.
സ്വര്‍ണകള്ളകടത്തുമായി ബന്ധപ്പെട്ട് കേസുകളോ റെയ് ഡുകളോ ഇതുവരെ ഉണ്ടായിട്ടില്ല എന്നും ജ്വല്ലറി അധികൃതര്‍ പറയുന്നു.

വ്യാജവാര്‍ത്തകള്‍ പ്രചരിപ്പിച്ചവര്‍ക്കെതിരെ നിയമ നടപടികള്‍ സ്വീകരിക്കുമെന്ന് ‍‍ജ്വല്ലറി അധികൃതര്‍ പറഞ്ഞു. ഔദ്യോഗിക ലെറ്റര്‍ ഹെഡിലാണ് ഈ വിവരങ്ങള്‍ അറിയിച്ചത്.

ലെറ്റര്‍ഹെഡിന്‍റെ പൂര്‍ണ്ണരൂപം:

സ്വർണ്ണ കടത്തുമായി ബന്ധപ്പെട്ട് എസ് എസ് ജ്വല്ലറി ഉടമ അറസ്റ്റിലായി എന്ന വാർത്ത ചാനലുകളിലൂടെയും സമൂഹ മാധ്യമങ്ങളിലൂടെയും വ്യാജ സന്ദേശങ്ങൾ പ്രചരിച്ചിരുന്നു. ഇത് പ്രകാരം മേൽ പറഞ്ഞ എന്‍റെ സ്ഥാപനം ചെമ്മാട് , പരപ്പനങ്ങാടി, മണ്ണൂർ വളവ് (ഫറോക്ക്‌) എന്നിവിടങ്ങളിൽ ആണ് പ്രവർത്തിക്കുന്നത് .2018 ജനുവരി 28 ന് ബഹുമാനപ്പെട്ട പാണക്കാട് ഹൈദർ അലി ശിഹാബ് തങ്ങൾ ഉദ്ഘാടനം ചെയ്ത മണ്ണൂർ വളവിലെ സ്ഥാപനത്തിന്‍റെ ഫോട്ടോസ് ദുരുപയോഗം ചെയ്തു നുണ പ്രചാരണം നടത്തി കൊണ്ടിരിക്കുന്നത് ശ്രദ്ധയിൽ പെട്ടിട്ടുണ്ട് . ഇതിനെതിരെ നിയമ നടപടികളുമായി മുന്നോട്ട് പോകുമെന്ന് ഇതിനാൽ അറിയിക്കുന്നു .

റിപ്പോർട്ടറിന്‍റെ വിശദീകരണം:-

മഞ്ചേരിയിൽ എസ്.എസ് എന്ന പേരിൽ ഒരു ഹോള്‍സെയില്‍ ജൂവലറി ഉണ്ട്. ഔദ്യോഗിമായി ഈ വാർത്ത പുറത്തു വന്നിരുന്നു. അതാണ്, തെറ്റിദ്ധരിച്ചു ഇത്തരത്തിൽ ഒരു വാർത്ത കൊടുക്കാൻ കാരണമായത്. തെറ്റായ വാർത്ത തിരുത്തുന്നു. ഖേദം അറിയിക്കുന്നു.