യുവതിയുടെ മോര്‍ഫ് ചെയ്ത ചിത്രം പ്രചരിപ്പിച്ചു; സീരിയല്‍ നടന്‍ ഉള്‍പ്പെടെ മൂന്ന് പേര്‍ അറസ്റ്റില്‍

തിരുവനന്തപുരം: യുവതിയുടെ മോര്‍ഫ് ചെയ്ത പ്രചരിപ്പിച്ച സംഭവത്തില്‍ സീരിയല്‍ നടന്‍ ഉള്‍പ്പെടെ മൂന്ന് പേര്‍ അറസ്റ്റില്‍. തിരുവനന്തപുരം ഡെന്റല്‍ കോളേജിലെ അസിസ്റ്റന്റ് പ്രൊഫസര്‍ ഡോ.സുബു, സീരിയല്‍ നടനും നിര്‍മാതാവുമായ നെടുമങ്ങാട് വാളിക്കോട് സ്വദേശി ജസീര്‍ ഖാന്‍, നെടുമങ്ങാട് വേങ്കവിള സ്വദേശി ശ്രീജിത്ത് എന്നിവരാണ് അറസ്റ്റിലായത്.

യുവതിയുടെ ചിത്രം മോര്‍ഫ് ചെയ്ത് ഭര്‍ത്താവിന്റെയും ബന്ധുക്കളുടെയും വിലാസത്തിലും മൊബൈല്‍ ഫോണിലേക്കും പ്രതികള്‍ അയച്ചുകൊടുക്കുകയായിരുന്നു. ഇതോടെ യുവതിയും ഭര്‍ത്താവും അകന്ന് കഴിയുകയായിരുന്നു. ഇതിനിടെ യുവതിയുടെ ബന്ധുവായ മറ്റൊരു സ്ത്രീക്ക് ലഭിച്ച വാട്‌സ് ആപ് സന്ദേശത്തിന്റെ ചുവട് പിടിച്ചു നടത്തിയ അന്വേഷണത്തിലാണ് പ്രതികള്‍ കുടുങ്ങിയത്.

ജസീര്‍ ഖാന് മൊബൈല്‍ കണക്ഷന്‍ എടുത്ത് കൊടുത്തത് മൊബൈല്‍ കടയുടമ ശ്രീജിത്താണ്. സുഹൃത്തായ സുബുവിന്റെ നിര്‍ദേശം അനുസരിച്ചാണ് ജസീര്‍ ശ്രീജിത്തിനോട് സിം ആവശ്യപ്പെട്ടത്. വട്ടപ്പാറ സ്വദേശിയായ യുവാവ് മാസങ്ങള്‍ക്ക് മുന്‍പ് ആധാര്‍ കാര്‍ഡിന്റെ കോപ്പി എടുക്കുന്നതിന് ശ്രീജിത്തിന്റെ കടയിലെത്തിയിരുന്നു. ഈ സമയം ഒരു കോപ്പി കൂടുതല്‍ എടുത്ത് ശ്രീജിത്ത് അത് സൂക്ഷിച്ചിരുന്നു. ഈ വിലാസവും ജസീറിന്റെ ചിത്രവും വച്ചാണ് സിം എടുത്തത്.

തുടര്‍ന്ന് പോലീസ് ജസീറിനെ കസ്റ്റഡിയിലെടുത്തു. ഡോ. സുബു നല്‍കിയ പെണ്‍കുട്ടിയുടെ ചിത്രം മോര്‍ഫ് ചെയ്ത് പെണ്‍കുട്ടിയുടെ ബന്ധുവായ സ്ത്രീക്ക് വാട്‌സ്ആപിലൂടെ ചിത്രം അയച്ചത് താനാണെന്ന് ജസീര്‍ സമ്മതിച്ചു. സുബുവും പോലീസ് കസ്റ്റഡിയിലാണ്. ഇയാള്‍ കുറ്റം സമ്മതിച്ചു.

പെണ്‍കുട്ടിയുമായി പരിചയമുണ്ടായിരുന്ന സുബുവിന് അവരോട് അടുപ്പം തോന്നിയിരുന്നു. എന്നാല്‍ വിവാഹ ശേഷം യുവതിയുമായുള്ള അടുപ്പം കുറഞ്ഞതോടെ യുവതിയുടെ വിവാഹബന്ധം വേര്‍പെടുത്താനും ഈ അവസരം മുതലെടുത്ത് കൂടുതല്‍ അടുക്കുവാനുമാണ് ഇങ്ങനെ ചെയ്തതെന്ന് സുബു കുറ്റസമ്മതം നടത്തി. വിവാഹിതനും മൂന്ന് കുട്ടികളുടെ പിതാവുമാണ് സുബു.