യുഡിഎഫിനെ എക്കാലത്തും സഹായിച്ചവര്‍ എല്‍ഡിഎഫിനോട് അടുത്തു: മുഖ്യമന്ത്രി

മുന്നോട്ട് കുതിക്കാനുള്ള ആത്മവിശ്വാസം സര്‍ക്കാരിനുണ്ടെന്ന് മുഖ്യമന്ത്രി പിണറായി വിജയന്‍. ജനങ്ങള്‍ക്ക് നല്‍കിയ വാഗ്ദാനങ്ങള്‍ പൂര്‍ത്തിയാക്കാന്‍ സാധിച്ചതില്‍ സംതൃപ്തിയുണ്ടെന്നും മുഖ്യമന്ത്രി പറഞ്ഞു.

തെരഞ്ഞെടുപ്പ് പ്രകടനപത്രിക തയ്യാറാക്കാന്‍ നടപടി തുടങ്ങി. മുന്‍ഗണന അനുസരിച്ചാണ് കര്‍മപദ്ധതി തയ്യാറാക്കുക. നവകേരളം സൃഷ്ടിക്കുക എന്ന ലക്ഷ്യത്തോടെയാണ് സര്‍ക്കാര്‍ പ്രവര്‍ത്തിക്കുന്നതെന്നും മുഖ്യമന്ത്രി പറഞ്ഞു.

കേരള പര്യടനം ഒട്ടേറെ നൂതന ആശയങ്ങളുമായി സമ്പന്നമായിരുന്നു. സമഗ്രമായ ചര്‍ച്ചകളാണ് നടന്നത്. എല്‍ഡിഎഫിനോട് നേരത്തെ അകലം പാലിച്ച് നിന്നവര്‍ പോലും ചര്‍ച്ചകളില്‍ പങ്കെടുത്തിരുന്നു. യുഡിഎഫിനെ എക്കാലത്തും സഹായിച്ചവര്‍ എല്‍ഡിഎഫിനോട് അടുത്തുവെന്ന് മുഖ്യമന്ത്രി പറഞ്ഞു.

കേരള യാത്രയില്‍ ഇവരും നിര്‍ദേശങ്ങള്‍ സമര്‍പ്പിച്ചു. ജമാ അത്തെ ഇസ്‌ലാമിയെ പങ്കെടുപ്പിക്കാനാവില്ല. ഏറ്റവും കൂടുതല്‍ നിര്‍ദേശങ്ങള്‍ വിദ്യാഭ്യാസ മേഖലയില്‍ നിന്നാണ്. പൊതുജനങ്ങള്‍ക്കും ആശയങ്ങള്‍ നല്‍കാം. പ്രകടന പത്രികയില്‍ ഉള്‍പ്പെടുത്തുമെന്നും മുഖ്യമന്ത്രി പറഞ്ഞു..