ഇന്ധന വില സര്‍വകാല റെക്കോര്‍ഡില്‍; പെട്രോള്‍ വില 90 തൊടുന്നു

തിരുവനന്തപുരം: സംസ്ഥാനത്ത് ഡീസലിന് പിന്നാലെ പെട്രോള്‍ വിലയും സര്‍വകാല റെക്കോഡില്‍. സംസ്ഥാനത്ത് പെട്രോളിന് ഇന്ന് 35 പൈസ കൂടി. കൊച്ചിയില്‍ ഇതോടെ പെട്രോളിന് ലിറ്ററിന് 86 രൂപ 32 പൈസയായി. കൊച്ചിയില്‍ 2018 ഒക്ടോബറിലുണ്ടായിരുന്ന 85 രൂപ 99 പൈസയെന്ന റെക്കോഡാണ് ഇതോടെ തകര്‍ന്നത്.

തിരുവനന്തപുരത്ത് ഇന്ന് പെട്രോളിന് വില ലിറ്ററിന് 88 രൂപ 06 പൈസയാണ്. തിരുവനന്തപുരത്തെ ഗ്രാമ പ്രദേശങ്ങളില്‍ ലിറ്ററിന് 89 രൂപ 50 പൈസയാകും. ഡീസലിന് ഇന്ന് കൂടിയത് 37 പൈസയാണ്. കൊച്ചിയില്‍ ഇതോടെ ഡീസല്‍ വില 80 രൂപ 51 പൈസയായി.

തിരുവനന്തപുരത്ത് ഡീസലിന് വില 82 രൂപ 14 പൈസയാണ്. അന്താരാഷ്ട്ര വിപണിയില്‍ ക്രൂഡ് ഓയിലിന് വില കുറഞ്ഞ് നില്‍ക്കുമ്പോഴാണ് ഇന്ധനവില കൂട്ടുന്നത് എന്നതാണ് ശ്രദ്ധേയം. ഈ മാസം ഇത് ആറാം തവണയാണ് വില കൂടുന്നത്.