നെയ്യാറ്റിന്‍കരയിലെ ദമ്പതികളുടെ മരണം; പരാതിക്കാരിയായ വസന്തയെ വീട്ടില്‍ നിന്ന് മാറ്റി

തിരുവനന്തപുരം: നെയ്യാറ്റിന്‍കരയിലെ ദമ്പതികളുടെ മരണത്തില്‍ ദമ്പതികള്‍ക്കെതിരെ പരാതി നല്‍കിയ വസന്തയെ വീട്ടില്‍ നിന്നും മാറ്റി. ക്രമസമാധാനം കണക്കിലെടുത്താണ് നടപടിയെന്ന് പോലീസ് പറഞ്ഞു.

അതേസമയം, മരിച്ച ദമ്പതികളുടെ മക്കള്‍ക്ക് വസ്തു വിട്ടുനല്‍കില്ലെന്ന് വസന്ത പറഞ്ഞു. തര്‍ക്ക സ്ഥലം തന്റേതാണ്. ഇക്കാര്യം കോടതിയില്‍ തെളിയിക്കും. നിയമപരമായി മാത്രമാണ് ഇടപെട്ടത്. വസ്തു വിട്ടുകൊടുക്കുന്ന പ്രശ്‌നമില്ല. നിയമത്തിന്റെ മുന്നില്‍ തന്നെ മുട്ടുകുത്തിച്ചിട്ട് വേണമെങ്കില്‍ വസ്തു ഏറ്റെടുക്കാമെന്ന് വസന്ത പറഞ്ഞു.

താന്‍ ക്ഷമിച്ചേനെ…പക്ഷെ കോളനിക്കാര്‍ ഒന്നിച്ച് നിന്ന് തന്നെ ഒരുപാട് ദ്രോഹിച്ചു. പാവങ്ങള്‍ക്ക് വേണമെങ്കില്‍ വസ്തു നല്‍കും. പക്ഷേ ഗുണ്ടായിസം കാണിച്ചവര്‍ക്ക് വസ്തു വിട്ടുനല്‍കില്ല. ഒരു കുറ്റവും ചെയ്തിട്ടില്ലെന്നും ആരെയും ദ്രോഹിച്ചിട്ടില്ലെന്നും വസന്ത പറഞ്ഞു.

അതേസമയം, പോലീസിന്റെ ഭാഗത്തെ വീഴ്ച്ച പരിശോധിക്കുമെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. തെറ്റുകാര്‍ക്കെതിരെ നടപടിയെടുക്കും. വിഷയം മുതലെടുക്കാന്‍ ചിലര്‍ ശ്രമിക്കുന്നു. വിശദമായ അന്വേഷണം വേണമെന്ന് കടകംപള്ളി പറഞ്ഞു.