നീറ്റ്, ജെ.ഇ.ഇ പരീക്ഷാ നടത്തിപ്പ്: വിദ്യാര്‍ഥികളോടുള്ള അനീതിയെന്ന് ഗ്രെറ്റാ തന്‍ബര്‍ഗ്

നീറ്റ് , ജെ ഇ ഇ മെയിന്‍ പ്രവേശന പരീക്ഷകള്‍ നടത്താനുള്ള കേന്ദ്ര തീരുമാനത്തിനെതിരെ കടുത്ത വിയോജിപ്പുമായി ലോക പ്രശസ്ത പരിസ്ഥിതി കാലാവസ്ഥാ പ്രവര്‍ത്തക ഗ്രെറ്റ തന്‍ബെര്‍ഗ്. ആഗോള മഹാമാരിയുടെ പശ്ചാത്തലത്തില്‍ വിദ്യാര്‍ഥികള്‍ പരീക്ഷക്ക് ഹാജരാകുന്നത് അനീതിയാണെന്ന് അവര്‍ പറഞ്ഞു. കോവിഡ് മഹാമാരിയും പ്രളയവും കനത്ത നാശം വിതച്ച സന്ദര്‍ഭത്തില്‍ പ്രവേശന പരീക്ഷ നടത്തുന്നത് തീര്‍ത്തും അനുചിതമാണ്. അതുകൊണ്ട് ഞാന്‍ പരീക്ഷ മാറ്റിവെക്കണമെന്ന നിലപാടിനൊപ്പം നിലകൊള്ളുന്നു- ഗ്രേറ്റ ട്വിറ്ററില്‍ കുറിച്ചു. നിരവധി വിദ്യാര്‍ഥികളാണ് ഗ്രെറ്റയുടെ ട്വീറ്റിന് പിന്തുണയുമായെത്തിയത്.

നീറ്റ്, ജെ ഇ ഇ പരീക്ഷകള്‍ സെപ്തംബറില്‍ നടത്താനാണ് കേന്ദ്രത്തിന്‍റെ തീരുമാനം. പരീക്ഷ മാറ്റിവെക്കാന്‍ ഉത്തരവിടണമെന്നാവശ്യപ്പെട്ട് ഏതാനും വിദ്യാര്‍ഥികള്‍ നല്‍കിയ ഹര്‍ജി സുപ്രീം കോടതി നേരത്തേ നിരസിച്ചിരുന്നു.