നാഷണല്‍ ആംബുലന്‍സ് സര്‍വ്വീസില്‍ ജോലി വാഗ്ദാനം -തട്ടിപ്പെന്ന് അധികൃതര്‍

കോവിഡ് കാലത്ത് ആവശ്യത്തിന് സ്റ്റാഫ് ഇല്ലാത്തതിനാലാണ് പുതിയ റിക്രൂട്ട്‌മെന്റെന്ന് കാണിച്ചാണ് സാമൂഹ്യ മാധ്യമങ്ങളില്‍ പരസ്യം

അബുദാബി : സര്‍ക്കാര്‍ ഉടമസ്ഥതിയിലുള്ള ആംബുലന്‍സ് സര്‍വ്വീസിലേക്ക് പുതിയ സ്റ്റാഫ് റിക്രൂട്ട്‌മെന്റ് നടത്തുന്നതായി കാണിച്ചുള്ള സോഷ്യല്‍മീഡിയ പരസ്യങ്ങളില്‍ ആകൃഷ്ടരായി വഞ്ചിതരാകെന്ന് ആരോഗ്യ വകുപ്പ് അധികൃതര്‍ അറിയിച്ചു.

കോവിഡ് കാലത്ത് അധിക സ്റ്റാഫ് ആവശ്യമുണ്ടെന്നും ഹൈസ്‌കൂള്‍ വരെ പഠിച്ചവര്‍ക്ക് പ്രത്യേക പരിചയമില്ലാതെ തന്നെ പ്രതിമാസം 4500 ദിര്‍ഹം (90,000 രൂപ) ശമ്പലം ലഭിക്കുമെന്നും കാണിച്ചാണ് സാമൂഹ്യ മാധ്യമങ്ങളില്‍ പരസ്യം പ്രചരിക്കുന്നത്.

യുഎഇ പൗരന്‍മാരായ ബിരുദധാരികള്‍ക്ക് പ്രത്യേക പരിശീലനം നല്‍കിയാണ് ജോലിക്കെടുക്കുക. ഹൈസ്‌കൂള്‍ വരെ പഠിച്ചവരെ ജോലിക്കെടുക്കുമെന്ന് കാണിച്ചുള്ള പരസ്യങ്ങള്‍ പ്രചരിപ്പിക്കുന്നത് ശ്രദ്ധയില്‍പ്പെട്ടിട്ടുണ്ട്. ഇത് വ്യാജമാണ്.

പാരാമെഡിക്കല്‍ ജോലികള്‍ക്ക് പ്രത്യേക പരിശീലനവും വിദ്യാഭ്യാസ യോഗ്യതയും ആവശ്യമാണ്. നാഷണല്‍ ആംബുലന്‍സ് സര്‍വ്വീസില്‍ നിയമിക്കപ്പെടുന്നതിന് യോഗ്യതയും പരിചയവും ആവശ്യമാണ്.

ഇതിനായി പാരാമെഡികല്‍ കോഴ്‌സുകള്‍ പഠിപ്പിക്കുന്ന സ്ഥാപനങ്ങളുമായി കരാറുണ്ട്. ഈ കോഴ്‌സുകളില്‍ നിന്ന് ബിരുദം നേടിയവരെ മാത്രമെ ജോലിക്ക് നിയമിക്കുവെന്നും അധികൃതര്‍ വ്യക്തമാക്കി.

പ്രവാസികളായ നഴ്‌സിംഗ് സ്റ്റാഫുകളെ ഇത്തരത്തില്‍ നിയമിക്കുന്നതായും പരസ്യങ്ങള്‍ സാമൂഹ്യ മാധ്യമങ്ങളില്‍ പ്രചരിക്കുന്നുണ്ട്. പലരും ഇവരുടെ തട്ടിപ്പിന് ഇരയാകുന്നുമുണ്ട്. വ്യാജ ഏജന്‍സികളുടെ തട്ടിപ്പിന് ഇരയാകാതെ ഇത്തരം സന്ദര്‍ഭങ്ങളില്‍ ബന്ധപ്പെട്ട വകുപ്പുകളായും സ്ഥാപനങ്ങളുമായും ആശയവിനിമയം നടത്തി നിജസ്ഥിതി മനസ്സിലാക്കണമെന്നും അധികൃതര്‍ അറിയിച്ചു.