കുവൈത്തില്‍ രണ്ടാം ഡോസ് കോവിഡ് പ്രതിരോധ കുത്തിവെപ്പ് തുടങ്ങി

കുവൈത്ത് സിറ്റി: കുവൈത്തില്‍ രണ്ടാം ഡോസ് കോവിഡ് പ്രതിരോധ കുത്തിവെപ്പ് തുടങ്ങി. രാജ്യത്ത് ആദ്യം കുത്തിവെപ്പെടുത്ത പ്രധാനമന്ത്രി ശൈഖ് സബാഹ് ഖാലിദ് അല്‍ ഹമദ് അസ്സബാഹ് തന്നെ രണ്ടാം ഡോസും സ്വീകരിച്ച് ഉദ്ഘാടനം ചെയ്തു. തുടര്‍ന്ന് ഉപപ്രധാനമന്ത്രി അനസ് അല്‍ സാലിഹ്, ആരോഗ്യ മന്ത്രി ഡോ. ബാസില്‍ അസ്സബാഹ്, സര്‍ക്കാര്‍ വക്താവ് താരിഖ് അല്‍ മസ്‌റം, ആരോഗ്യ മന്ത്രാലയം വക്താവ് ഡോ. അബ്ദുല്ല അല്‍ സനദ് തുടങ്ങിയവര്‍ രണ്ടാം ഡോസ് സ്വീകരിച്ചു.

ആദ്യ ഡോസെടുത്ത് 21 ദിവസത്തിനുശേഷമാണ് രണ്ടാമത്തെ ഡോസ് എടുക്കേണ്ടത്. ഇത് ബൂസ്റ്റര്‍ ഡോസാണ്. രണ്ടാം ഡോസ് എടുത്ത് ഒരാഴ്ചക്ക് ശേഷമാണ് ഫലം പൂര്‍ണ തോതില്‍ ലഭിക്കുക. കോവിഡ് പ്രതിരോധ കുത്തിവെപ്പിന്റെ ആദ്യ ഡോസ് എടുത്ത ശേഷം രണ്ടാം ഡോസ് എടുക്കുന്നതിന് മുമ്പ് വിദേശയാത്ര നടത്തരുതെന്ന് ആരോഗ്യ മന്ത്രാലയം മുന്നറിയിപ്പ് നല്‍കിയിട്ടുണ്ട്. ഇതുവരെ ആര്‍ക്കും പാര്‍ശ്വഫലങ്ങള്‍ റിപ്പോര്‍ട്ട് ചെയ്തിട്ടില്ല. ഡിസംബര്‍ 24നാണ് രാജ്യത്ത് കോവിഡ് പ്രതിരോധ കുത്തിവെപ്പ് ആരംഭിച്ചത്. ഇതുവരെ 15,000ത്തില്‍ താഴെ പേര്‍ക്ക് മാത്രമേ വാക്‌സിന്‍ നല്‍കിയിട്ടുള്ളൂ.

48 ലക്ഷം വരുന്ന കുവൈത്ത് ജനസംഖ്യയില്‍ ഒരു ശതമാനത്തിന് പോലും വാക്‌സിനേഷന്‍ പൂര്‍ത്തിയാവണമെങ്കില്‍ ജനുവരി കഴിയേണ്ടി വരും. ആഗോള തലത്തിലെ വിവിധ രാജ്യങ്ങളുമായി താരതമ്യം ചെയ്യുമ്പോള്‍ വാക്‌സിനേഷന്‍ നിരക്കില്‍ കുവൈത്ത് പിന്നിലാണ്. 2021 സെപ്റ്റംബറോടെ 80 ശതമാനം രാജ്യനിവാസികള്‍ക്ക് കോവിഡ് പ്രതിരോധ കുത്തിവെപ്പെടുക്കാനാണ് കുവൈത്ത് ആരോഗ്യ മന്ത്രാലയം ലക്ഷ്യമിടുന്നത്.