സെെനികരോട് 89 ചെെനീസ് ആപ്പുകള്‍ ഒഴിവാക്കാൻ നിര്‍ദേശിച്ച് കരസേന

ഇന്ത്യൻ സെെനികരോട് 89 ചെെനീസ് നിര്‍മ്മിത ആപ്പുകള്‍ ഒഴിവാക്കാൻ ആവശ്യപ്പെട്ട് കരസേന.രാജ്യസുരക്ഷയെ മുന്‍നിര്‍ത്തി 59 ചൈനീസ് ആപ്പുകള്‍ക്ക് നിരോധനം ഏര്‍പ്പെടുത്തിയതിന് പിന്നാലെയാണ് നിയന്ത്രണം കടുപ്പിച്ചിരിക്കുന്നത്. സൈനികരോട് മൊബൈല്‍ ഫോണുകളില്‍ നിന്നും ചൈനയുടെ 89 ആപ്പുകള്‍ ഡിലീറ്റ് ചെയ്യാനാണ് കരസേന നിര്‍ദേശിച്ചിരിക്കുന്നത്. ഫേസ്ബുക്ക്, ഇന്‍സ്റ്റഗ്രാം തുടങ്ങിയ സോഷ്യല്‍ മീഡിയ ആപ്പുകളും മൊബൈല്‍ ഗെയിം ആപ്പായ പബ്ജി, ട്രൂകോളര്‍, ഡെയ്‌ലി ഹണ്ട് തുടങ്ങിയ ആപ്പുകള്‍ ഒഴിവാക്കാനാണ് നിര്‍ദേശം. ജൂലൈ 15 നകം ഈ ആപ്പുകളിലെ അക്കൗണ്ട് ഉപേക്ഷിക്കണമെന്നാണ് കരസേന ആവശ്യപ്പെട്ടിരിക്കുന്നത്.

നിര്‍ണായക വിവരങ്ങള്‍ ചോര്‍ത്തപ്പെടാനുളള സാധ്യതകള്‍ മുന്നില്‍ കണ്ടുകൊണ്ടാണ് സൈനികര്‍ക്ക് നിര്‍ദേശം നല്‍കിയിരിക്കുന്നത്. വിവര ചോര്‍ച്ച തടയുന്നതിനു വേണ്ടിയാണ് ആപ്പുകള്‍ ഡിലീറ്റ് ചെയ്യാന്‍ സൈനികരോട് ആവശ്യപ്പെട്ടതെന്ന് സൈനിക വൃത്തങ്ങള്‍ വ്യക്തമാക്കി.ഇത് സംബന്ധിച്ച കൂടുതല്‍ വിവരങ്ങള്‍ പുറത്തുവിടുമെന്ന് സൈനിക വൃത്തങ്ങള്‍ അറിയിച്ചു. എന്നാല്‍ നിരോധിച്ച ആപ്പുകളുടെ കൂട്ടത്തില്‍ വാട്‌സ്ആപ്പിനെ ഉള്‍പ്പെടുത്തിയിട്ടില്ല. 2019 നവംബറില്‍ വാട്‌സ് ആപ്പിലൂടെ ഔദ്യോഗിക വിവരങ്ങള്‍ കൈമാറരുതെന്ന് കരസേന നിര്‍ദേശം നല്‍കിയിരുന്നു.