കോവിഡിനെ അതിജീവിച്ച് ദുബായ് എക്‌സ്‌പോ മുന്നോട്ട്, സന്ദര്‍ശകരുടെ എണ്ണം ഒരുകോടിയിലേക്ക്

ആഗോള ശ്രദ്ധ നേടിയ ദുബായ് എക്‌സ്‌പോ കോവിഡ് ഭീതികളെയെല്ലാം അതിജീവിച്ച് മുന്നേറുന്നു. മേള തുടങ്ങി മൂന്നു മാസമെത്തിയപ്പോള്‍ സന്ദര്‍ശകരുടെ എണ്ണം 90 ലക്ഷം കടന്നതായി സംഘാടകര്‍ അറിയിച്ചു.

ദുബായ് : കോവിഡ് കാലത്തെ അതിജീവിച്ച് എക്‌സ്‌പോ 2020 ജനപിന്തുണയോടെ മുന്നോട്ട്. ഒക്ടോബറില്‍ ആരംഭിച്ച മേള പാതിവഴി പിന്നിട്ടപ്പോള്‍ സന്ദര്‍ശകരുടെ എണ്ണത്തില്‍ റെക്കോര്‍ഡ് നേട്ടമാണ് കൈവരിച്ചിരിക്കുന്നത്.

ആറു മാസം നീളുന്ന മേളയ്ക്ക് ഇതുവരെ എത്തിയത് 90 ലക്ഷം പേരാണെന്ന് സംഘാടകര്‍ അറിയിച്ചു. ആദ്യ മൂന്നു മാസം കൊണ്ട് 8,956,132 പേരാണ് എക്‌സ്‌പൊയില്‍ എത്തിയത്.

വിവിധ രാഷ്ട്രത്തലവന്‍മാരും മന്ത്രിമാരും നയതന്ത്ര പ്രതിനിധികളും ഉള്‍പ്പടെ ഭരണ രംഗത്തുള്ള 8,902 പേര്‍ എക്‌സ്‌പോ സന്ദര്‍ശിച്ചു.

സീസണ്‍ പാസ് ഉപയോഗിച്ച് എത്തിയവരാണ് എണ്ണം 35 ലക്ഷമാണ്. ആകെ സന്ദര്‍ശകരില്‍ 30 ശതമാനം പേര്‍ യുഎഇയ്ക്ക് പുറത്തു നിന്നും എത്തിയവരാണ്.

ശക്തമായ കോവിഡ് നിയന്ത്രണങ്ങളോടെയാണ് എക്‌സ്‌പോ മേള നടത്തുന്നത്. എക്‌സ്‌പോയില്‍ പങ്കെടുക്കുന്നവരുടേയും സന്ദര്‍ശകരുടേയും സുരക്ഷയ്ക്കാണ് പ്രാഥമിക പരിഗണനയെന്ന് യുഎഇ രാജ്യാന്തര സഹകരണ മന്ത്രിയും എക്‌സ്‌പോയുടെ ഡയറക്ടറല്‍ ജനറലുമായ റീം അല്‍ ഹാഷിമി പറഞ്ഞു.