‘ഓരോ വാക്കും ഓരോ പൂവായി’- ദുബായ് മിറാക്കിള്‍ ഗാര്‍ഡന്‍ തുറന്നു

ദുബായ് : അത്ഭുതങ്ങളില്‍ മഹാത്ഭുതം എന്ന് സഞ്ചാരികള്‍ വിശേഷിപ്പിക്കുന്ന ലോകത്തിലെ ഏറ്റവും വലിയ ഉദ്യാനം ദുബായ് മിറാക്കിള്‍ ഗാര്‍ഡന്‍ തുറന്നു. പുഷ്പ ലോകത്തെ നവ്യാനുഭവം മാത്രമല്ല സന്ദര്‍ശകരുടെ ആരോഗ്യവും സുരക്ഷയും ഉറപ്പാക്കുന്നതിലുള്ള നടപടിക്രമങ്ങളും മിറാക്കിള്‍ ഗാര്‍ഡനില്‍ അധികൃതര്‍ ഒരുക്കിയിട്ടുണ്ട്‌.

ദുബായ് ഹെല്‍ത്ത് അതോറിറ്റിയുടെ നിര്‍ദ്ദേശ പ്രകാരമാവും ഗാര്‍ഡന്‍ പ്രവര്‍ത്തിക്കുക. സന്ദര്‍ശകരുടെ ശരീരോഷമാവ് പരിശോധിച്ചതിനു ശേഷമാവും പൂന്തോട്ടത്തിലേക്ക് പ്രവേശിപ്പിക്കുക. എല്ലാ പ്രദേശങ്ങളിലും സാനിടൈസര്‍ ലഭ്യമാകും. മുഖാവരണം ധരിക്കല്‍, സാമൂഹിക അകലം പാലിക്കല്‍ തുടങ്ങിയ നിയമങ്ങളും കര്‍ശനമായി നടപ്പാക്കും. ബോട്ടാണിക്കല്‍ ഗാര്‍ഡന്റെ സഹസ്ഥാപകനും സിറ്റി ലാന്‍ഡ് ഗ്രൂപ്പ് ചെയര്‍മാനുമായ എന്‍ജിനീയര്‍ അബ്ദുള്‍ നാസര്‍ റഹാല്‍ പറഞ്ഞു .

120 ഇനത്തില്‍ പെട്ട 15 കോടി പൂക്കളാണ് ഈ ഉദ്യാനത്തില്‍ ഒരുക്കിയിരിക്കുന്നത്. ദുബയ് ലാന്റിന്റെ പ്രധാന ഭാഗത്ത് 72,000 ച. മീറ്ററിലാണ് ഗാര്‍ഡന്‍ ഒരുക്കിയിരിക്കുന്നത്. വിവിധ വൈദ്യുത ദീപാലങ്കാരങ്ങളും ആംഫി തിയേറ്ററുകളും ഇവിടുത്തെ മുഖ്യ ആകര്‍ഷകമാണ്. 400 മീറ്റര്‍ നീളത്തിലുള്ള നടപ്പാതക്ക് ഇരുവശങ്ങളിലുമായി പുഷ്പങ്ങളാലും അലങ്കാര ചെടികള്‍ ഡിസൈന്‍ ചെയ്ത് കൂറ്റന്‍ ഗോപുരങ്ങളും മൃഗങ്ങളുടെ രൂപങ്ങളും ഉദ്യാനത്തിന് മാറ്റ് കൂട്ടുന്നു. ഗേറ്റുകളിലും പ്രമുഖ കാര്‍ട്ടൂണ്‍ രൂപങ്ങള്‍ കുട്ടികളെ ഏറെ ആകര്‍ഷിക്കുന്നു. പൂക്കളാല്‍ അലങ്കരിച്ച എമിറേറ്റ്സ് വിമാനവും ഇവിടുത്തെ പ്രത്യേക ആകര്‍ഷകമാണ്. രാവിലെ 9 മുതല്‍ രാത്രി 9 വരെയാണ് സന്ദര്‍ശന സമയം. വെള്ളി ശനി ദിവസങ്ങളില്‍ രാത്രി 11 വരെയാണ് സന്ദര്‍ശനം അനുവിദിച്ചിരിക്കുന്നത്.