ദുബായില്‍ ആരോഗ്യകേന്ദ്രങ്ങള്‍ അണുവിമുക്തമാക്കാൻ റോബോട്ടുകള്‍ തയ്യാറെടുക്കുന്നു

ദുബായ്: ആശുപത്രികളും ആരോഗ്യകേന്ദ്രങ്ങളും അണുവിമുക്തമാക്കാൻ റോബട്ടുകളെ വിന്യസിച്ചു. സാധാരണ ചികിത്സകളും ശസ്ത്രക്രിയകളും തുടങ്ങിയതോടെയാണ് എളുപ്പത്തിലും കാര്യക്ഷമമായും അണുവിമുക്തമാക്കാൻ റോബട്ടുകളെ ഉപയോഗിക്കുന്നതെന്ന് ദുബായ് ഹെൽത്ത് അതോറിറ്റി(ഡിഎച്ച്എ) അധികൃതർ വ്യക്തമാക്കി.

ഡിഎച്ച്എയുമായി അഫിലിയേറ്റ് ചെയ്തിട്ടുള്ള സ്ഥാപനങ്ങളിലാണ് ഇവ ഉപയോഗിക്കുക. മനുഷ്യ സ്പർശമില്ലാതെ പൂർണമായും സ്വയം പ്രവർത്തിക്കുന്നതാണ് ഈ റോബട്ടുകൾ.

10-15 മിനിറ്റിനുള്ളിൽ ഒരു മുറി മുഴുവൻ പൂർണമായി അണുവിമുക്തമാക്കാൻ റോബട്ടിന് സാധിക്കും. 360 ഡിഗ്രിയിൽ വട്ടം ചുറ്റി ജോലി ചെയ്യാനും ഇവയ്ക്കു കഴിയും. അൾട്രാ വയലറ്റ് ഉപയോഗിച്ചുള്ള അണുനശീകരണമാണ് ഇവ നടത്തുന്നതെന്നും അധികൃതർ വ്യക്തമാക്കി.