പ്രസിഡന്റ് തെരഞ്ഞെടുപ്പ് നീട്ടിവെയ്ക്കണമെന്ന് ഡൊണാള്‍ഡ് ട്രംപ്

വാഷിംഗ്ടണ്‍: 2020 ലെ അമേരിക്കന്‍ പ്രസിഡന്റ് തെരഞ്ഞെടുപ്പ് മാറ്റിവെയ്ക്കണമെന്ന നിര്‍ദേശവുമായി പ്രസിഡന്റ് ഡൊണാള്‍ഡ് ട്രംപ്. കോവിഡിന്റെ പശ്ചാത്തലത്തില്‍ നടത്തുന്ന വോട്ടിങ്ങില്‍ തട്ടിപ്പ് നടക്കാന്‍ സാധ്യതുണ്ടെന്നും ട്രംപ് ആരോപിച്ചു. ട്വിറ്ററിലൂടെയാണ് അദ്ദേഹം ഇക്കാര്യം അറിയിച്ചത്. ജനങ്ങള്‍ക്ക് കൃത്യമായും സുരക്ഷിതമായും വോട്ട് ചെയ്യാനാകുന്നതുവരെ തെരഞ്ഞെടുപ്പ് നീട്ടിവെയ്ക്കുന്നതല്ലേ ഉചിതമെന്നാണ് ട്രംപ് ചോദിക്കുന്നത്.

മെയില്‍ ഇന്‍ വോട്ടിങ്ങിലൂടെ നടത്തുന്ന തെരഞ്ഞെടുപ്പ് അമേരിക്കയുടെ ചരിത്രത്തിലെ തന്നെ വഞ്ചാനപരവും കൃത്യതയില്ലാത്തതുമായ തെരഞ്ഞെടുപ്പായിരിക്കും. ഇത് അമേരിക്കയ്ക്ക് തന്നെ വലിയ നാണക്കേട് ഉണ്ടാക്കുമെന്നും അദ്ദേഹം ട്വീറ്റ് ചെയ്തു.

അമേരിക്കന്‍ ഭരണഘടന പ്രകാരം തെരഞ്ഞെടുപ്പ് നീട്ടിവെയ്ക്കാന്‍ ട്രംപിന് അധികാരമില്ല. അമേരിക്കന്‍ ഫെഡറല്‍ കോണ്‍ഗ്രസ്സാണ് പ്രസിഡന്റ് തെരഞ്ഞെടുപ്പിനുളള തീയ്യതികള്‍ നിശ്ചയിക്കുന്നത്. ഈ വര്‍ഷം നവംബറിലാണ് പ്രസിഡന്റ് തെരഞ്ഞെടുപ്പ് നടക്കേണ്ടത്.