ഡെപ്യൂട്ടി ചെയർമാന്റെ സന്ദർശനം നാടകമായിരുന്നെന്ന് അറിഞ്ഞില്ല; കെ.കെ രാഗേഷ് എം.പി

സസ്പെൻഷൻ ചെയ്യപ്പെട്ടതിനെ തുടർന്ന് പ്രതിഷേധ ധർണ്ണ നടത്തുന്ന എം.പി.മാരെ രാജ്യസഭ ഡപ്യൂട്ടി ചെയർമാൻ ഇന്ന് കാലത്ത് സമരമുഖത്ത് സന്ദർശിച്ചു. ഡെപ്യൂട്ടി ചെയർമാന്റെ സന്ദർശനം നാടകമായിരുന്നു എന്നത് പ്രധാനമന്ത്രിയുടെ ട്വീറ്റ് കണ്ടപ്പോഴാണ് വ്യക്തമായത്. താൻ ഡപ്യൂട്ടി ചെയർമാൻ എന്ന നിലയിൽ ഔദ്യോഗിക സന്ദർശനം നടത്തിയതല്ലെന്നും സമരം ചെയ്യുന്ന സഹപ്രവർത്തകരെ വ്യക്തിപരമായി സന്ദർശിച്ചതാണെന്നും പറഞ്ഞ അദ്ദേഹം പിന്നീട് രാജ്യസഭയിൽ ഉണ്ടായ സംഭവങ്ങളെ കുറിച്ച് ഉപവസിക്കാൻ പോകുകയാണെന്ന പ്രഖ്യാപനമാണ് നടത്തിയത്.നിമിഷങ്ങൾക്കകം അദ്ദേഹത്തിന്റെ മഹാ മനസ്കതയെ കുറിച്ച് പ്രധാനമന്ത്രിയുടെ ട്വീറ്റ് വന്നു.

ചട്ടവിരുദ്ധവും, ഭരണഘടന വിരുദ്ധവുമായ കർഷകദ്രോഹ കരിനിയമം പാസാക്കിയതോടെ ജനങ്ങളിൽ നിന്ന് ഒറ്റപ്പെട്ട ബി.ജെ.പിയും അതിന്റെ സഖ്യകക്ഷിയായ ജെ.ഡി യു വും മുഖം മിനുക്കുന്നതിന്റെ ഭാഗമായാണ് സന്ദർശനം നടത്തിയതെന്ന് വ്യക്തം. വരാനിരിക്കുന്ന ബിഹാർ ഇലക്ഷനിൽ ബി.ജെ.പിയും ജെ.ഡിയു വും കനത്ത തിരിച്ചടി ഏറ്റ് വാങ്ങാൻ പോകുകയാണ്. അതിൽ നിന്ന് രക്ഷപ്പെടാൻ മുഖം മിനുക്കുന്നതിന്റെ ഭാഗമായാണ് ഡപ്യൂട്ടി ചെയർമാന്റെ സമര മുഖത്തെ സന്ദർശനവും പ്രധാനമന്ത്രിയുടെ ട്വീറ്റും എന്ന് വ്യക്തം.ചെപ്പടി വിദ്യ കൊണ്ട് ഇനിയും ജനങ്ങളെ വഞ്ചിക്കാനാവില്ലെന്ന് ഇക്കൂട്ടർ ഓർക്കുന്നത് നന്ന്. കെ കെ രാഗേഷ് എം.പി സമൂഹമാധ്യമത്തില്‍ കുറിച്ചു.