ഇരുളും വെളിച്ചവും-കെഎം റോയ്‌

പ്രതാപ് നായർ

ദിൽ ഹൂം ഹൂം കരേ  ഖബ്റായെ …

ഏക് ബൂന്ദ് കഭി പാനി കി മോരി

അഖിയോൻ സേ ബർസായെ …

എന്റെ ഹൃദയമിടിക്കുകയാണ് ..പേടിയാവുന്നുണ്ട് ..പക്ഷെ ഒരുതുള്ളി കണ്ണീർ പോലും കണ്ണിൽ നിന്നും പൊഴിയില്ല …

രുദാലിയിലെ ഭൂപൻ ഹസാരികയുടെ സംഗീതം ആസ്വദിച്ച്  ഇരുളും വെളിച്ചവുമുള്ള വീട്ടിലെ വീൽ ചെയറിൽ ഇരിക്കുകയാണ് കേരളം കണ്ട ഏറ്റവും പ്രഗത്ഭനായ പത്രപ്രവർത്തകൻ കെഎം റോയ് … പാട്ടിലെ വരികൾ പോലെ ഒരു ഹൃദയമിടിപ്പിൽ ഒരു സാഗരം ഇരമ്പുന്നുണ്ട് അദ്ദേഹത്തിന്റെ കണ്ണിൽ, പക്ഷെ ആ മുഖത്ത് കരുത്തനായ ഒരാളുടെ നിശ്ചയ ദാർഢ്യം തെളിഞ്ഞു കാണാം

ദേശീയ അവാർഡ് നേടിയ പ്രദീപ് നായർ ഒരുക്കിയ കെഎം റോയി ഒരു പ്രകാശ രേഖ എന്ന ഡോക്യുമെന്ററി വരച്ചു കാട്ടുന്നതുന്നതു പത്രപ്രവർത്തകനായും, സാമൂഹ്യ പ്രവർത്തകനായും  ,കഴിഞ്ഞ  അൻപതിലധികം വർഷമായി തിളങ്ങി നിൽക്കുന്ന കെഎം റോയി എന്ന അസാമാന്യ വ്യക്തിത്വത്തെയാണ് .

പ്രൊഫസർ എംകെ സാനുമാഷിലൂടെയാണ് ചിത്രം ആരംഭിക്കുന്നത്, തുടർന്ന് എറണാകുളം മഹാരാജാസിലെ സോഷ്യലിസ്റ്റ് ചിന്താഗതിക്കാരനായ വിദ്യാർത്ഥി യൂണിയൻ നേതാവിനെ അനുസ്‌മരിക്കുന്നതു അന്നത്തെ സഹപാഠിയായ മുൻമന്ത്രി വയലാർ രവിയാണ്
കോളേജിൽ പഠിക്കുന്ന കാലത്തുള്ള റോയിയുടെ നേതൃപാടവവും ,വിദ്യാർത്ഥികൾക്കിടയിലുള്ള   സ്വാധീനവും ഡോക്യൂമെന്ററിയിൽ എടുത്തു പറയുന്നുണ്ട് .

കൊച്ചിക്കപ്പൽശാലയിൽ ആദ്യമിറക്കിയത് കെഎം റോയിയുടെ പേപ്പർ ബോട്ടാണ് എന്നുള്ള കൗതുകവും എന്നാൽ ഏറെ ചിന്തനീയവുമായ  ആർക്കുമറിയാത്ത  ഒരു സമര കഥ  , സംവിധായകൻ വിവരിക്കുന്നത് ഇങ്ങിനെയാണ്‌ . “കൊച്ചി കപ്പൽ ശാലയ്ക്ക് സ്ഥലം കൊടുത്ത അന്നത്തെ കൊച്ചിയിലെ ഒരു പ്രധാന കുടുംബമായിരുന്നു റോയിയുടേത് , നാടിന്റെ നന്മക്കായി കിടപ്പാടം വിട്ടു കൊടുത്ത ആ കുടുംബമടക്കമുള്ളവർക്കു കപ്പൽശാല  ഒരു വിദൂര സ്വപനമായി അവശേഷിച്ചപ്പോഴാണ് , പ്രതീകത്മക സമരത്തിന്  അന്നത്തെ യുവാവായ റോയി പേപ്പർ ബോട്ടുമായി ഇറങ്ങിയത് ” സമരം ഏറെ ശ്രദ്ധ നേടി ,റോയിയുടെ സമര വീര്യത്തിനെയും പ്രതികരണ ശേഷിയെയും  സംവിധായകൻ കൃത്യമായി വരച്ചിടുന്നു .

ഒരുകാലത്തു മംഗളം പത്രത്തിന്റെ കടുത്ത എതിരാളി ആയിരുന്ന മനോരമ പത്രവും അതിന്റെ എഡിറ്ററും  കെഎം റോയി എന്ന അസാമാന്യനായ  ധൈര്യവും പ്രാപ്തിയുമുള്ള പത്രപ്രവർത്തകന്റെ കഥ വിവരിക്കുന്നുണ്ട്. മനോരമയുടെ എഡിറ്റോറിയൽ ഡയറക്ടർ ആയിരുന്ന തോമസ് ജേക്കബ്, തനിക്കു പരിചയമുള്ള റോയിയുടെ സ്വഭാവത്തിലെ  സവിശേഷതകൾ എണ്ണിപ്പറയുന്നു.

പത്രപ്രവർത്തകരെ ഒന്നിപ്പിച്ച , അവർക്കു ഒരു പുതിയ ദിശാബോധം നൽകിയ കെഎം റോയുടെ ആ നിലയിലെ സംഭാവനകൾ മംഗളത്തിലെ  സഹപ്രവർത്തകരും, മാനേജിങ് എഡിറ്ററും ഓർത്തെടുക്കുന്നുണ്ട് ഈ ഡോക്യൂമെന്ററിയിൽ.

വെറുമൊരു നാലു  കോളം  വാർത്തയിൽ ഒതുങ്ങിപ്പോകേണ്ട  സിസ്റ്റർ അഭയ കേസിനെ, അതിന്റെ പ്രധാന്യത്തോടു കൂടി അവതരിപ്പിച്ചു , കേരള മനഃസാക്ഷിയിലേക്കു തുറന്നു വിട്ട റോയിയുടെ അന്നത്തെ ധൈര്യവും, സത്യസന്ധമായ വർത്തകളോടുള്ള സമീപനവും,  മംഗളത്തിന്റെ  മാനേജിങ് എഡിറ്ററും വളരെ പ്രാധാന്യത്തോടെ പറയുമ്പോൾ ഒരു കാലഘട്ടതിന്റെ കഥയാണ് നമുക്ക് ഓർമ്മവരുന്നത്.

 

കൊച്ചി മേയറാകാനും , എറണാകുളത്തു നിന്ന് പാർലമെന്റ് ഇലക്ഷന് മത്സരിക്കാനും റോയിക്കു കിട്ടുമായിരുന്ന അവസരങ്ങൾ നിരസിച്ച കഥകൾ അന്നത്തെ ജില്ലാ സെക്രട്ടറി ആയിരുന്ന എം എം ലോറൻസും, സെബാസ്റ്റ്യൻ പോളും പറയുന്നത്. റോയിയിലെ അധികാരമോഹമില്ലാത്ത ജനപ്രതിനിധിയുടെ മനസ്സിനെ തുറന്നു കാട്ടുന്നു . ഇടതുമുന്നണി കൺവീനർ വൈക്കം വിശ്വനും റോയിയുടെ പക്ഷമില്ലാത്ത രാഷ്ടീയ കഥകൾ ഈ ഡോക്യൂമെന്ററിയിൽ പങ്കു വെക്കുന്നു.

മുടങ്ങാതെ എല്ലാ ആഴ്ചയും റോയ് മംഗളം ആഴ്ചപ്പതിപ്പിൽ എഴുതിരുന്ന ഇരുളും  വെളിച്ചവുമെന്ന പംക്തി  സ്വാധീനിച്ച ആയിരക്കണക്കിന് മനുഷ്യ മനസ്സുകളുടെ കഥ, ഏറെ കൗതുകത്തോടെയായായിരിക്കും ഇന്നത്തെ  തലമുറ കാണുക. .പതിനാറ്  ലക്ഷം കോപ്പി എന്ന മാന്ത്രിക സംഖ്യ മംഗളത്തിന് കൈവന്നതിൽ റോയിയുടെ തൂലികയ്ക്കു ഏറെ സ്വാധീനം ഉണ്ടായിരുന്നു എന്നുള്ളതും ഏറെ ശ്രദ്ധേയമായ കാര്യമായിരുന്നു

മുല്ലപ്പെരിയാര്‍ ഡാമിന്റെ വസ്തുതാ കമ്മറ്റിയിൽ റോയി നൽകിയ സപ്പോർട്ട്  എടുത്തു പറഞ്ഞത് ജസ്റ്റിസ് കെടി  തോമസാണ് ,അത് പോലെ തന്നെ  പത്ര പ്രവർത്തകർക്ക് അന്താരാഷ്ട്ര നിലവാരത്തിലുള്ള ട്രെയിനിങ്ങിനു മുൻകൈ എടുത്ത, അവരുടെ ഉന്നമനത്തിനായി ഉണർന്നു പ്രവർത്തിച്ച റോയിലെ തൊളിലാളി വീര്യവും ,മാധ്യമ രംഗത്ത് നടത്തിയ പ്രവർത്തനങ്ങളും ഡോക്യൂമെന്ററിയിൽ പ്രതിപാദ്യമാവുന്നു.

കൊച്ചിയുടെയും കോട്ടയത്തിന്റെയും പുരോഗമനപരമായ പ്രവർത്തങ്ങളിൽ റോയിയുടെ സംഭാവനകൾ നിരവധിയാണ് .കെഎം റോയിയോടൊപ്പം പ്രവർത്തിച്ച സഹപ്രവർത്തകർ , സമകാലീനരായ പത്ര പ്രവർത്തകർ , രാഷ്ട്രീയ , സാമൂഹ്യ മേഖലയിലെ പ്രമുഖർ , കുടുംബാംഗങ്ങൾ , തുടങ്ങി നിരവധിപേരെ  അണിനിരത്തി ഒരു കാലഘട്ടത്തിന്റെ ചരിത്രമാണ് ഈ ഡോക്യൂമെന്ററിയിലൂടെ പ്രദീപ് നായർ എന്ന സംവിധാന പ്രതിഭ കോറിയിടുന്നത് .ദൃശ്യങ്ങൾക്ക് ചാരുത നൽകുന്ന ദേശീയ, രാജ്യാന്തര പുരസ്‌ക്കാര ജേതാവ് നിഖിൽ. എസ്. പ്രവീണിന്റെ ഛായാഗ്രഹണവും, സുനീഷ് സെബാസ്റ്റിൻറെ ദൃശ്യ സങ്കലനവും എടുത്തു പറയേണ്ടതാണ് . കേരള മീഡിയ അക്കാദമി നിർമ്മിച്ച മാധ്യമ രംഗത്തെ പ്രഗല്ഭരെ കുറിച്ചുള്ള പരമ്പരയിലെ ഒരു ഡോക്യൂമെന്ററിയാണിത് .

സോഷ്യലിസ്റ്റായി , പത്രപ്രവർത്തകനായി, ട്രേഡ് യൂണിയൻ നേതാവായി, ജനപ്രതിനിധിയായി ,സാമൂഹ്യ പ്രവർത്തകനായി, ചിന്തകനായി, അധ്യാപകനായി, ഒരു തലമുറയ്ക്ക് മുഴുവൻ പ്രചോദനമായി മാറിയ ഒരു അപൂർവ വ്യക്തിത്വത്തിന്റെ നേർക്കാഴ്ചയാണ് കെഎം റോയി ഒരു പ്രകാശ രേഖ എന്ന ഒരു മണിക്കൂർ ദൈർഖ്യമുള്ള ചിത്രം.

‘ നീ മധുപകരൂ മലർ ചൊരിയൂ അനുരാഗപൗർണ്ണമിയെ… നീ മായല്ലെ  മറയല്ലേ മറയല്ലേ നീല നിലാവൊളിയെ …. പാട്ടിൽ കണ്ണടച്ച് താളം പിടിച്ചിരിക്കുകയാണ് റോയി … എല്ലാം ആ മുഖത്തുണ്ട് , ശാരീരിക വിഷമതകൾ തീർത്ത മൗനം വാചാലവും …

 

ദേശീയ, സംസ്ഥാന അവാർഡുകൾ നേടിയ “ഒരിടം “, ചലച്ചിത്ര സമാഹാരം “ക്രോസ്സ് റോഡ് “, ചെറുക്കനും പെണ്ണും എന്നീ സിനിമകളുടെയും സംസ്ഥാന അവാർഡ് നേടിയ “കുട്ടനാട് :ഒരു അപൂർവ മരുത തിണ “, എ നിയോറിയലിസ്റ്റിക് ഡ്രീം, വെൻ ദി ലേബർ ലേബർസ്‌, മാൻ v/s നേച്ചർ: ദി സ്ട്രഗിൾ എറ്റേർണൽ, തുടങ്ങി നിരവധി ഡോക്യൂമെന്ററികളുടെയും പരസ്യ ചിത്രങ്ങളുടെയും സംവിധായകൻ ആണ് പ്രദീപ് നായർ.