സംസ്ഥാനത്ത് 6820 പേര്‍ക്ക് കോവിഡ്; രോഗികളുടെ എണ്ണത്തില്‍ 10% വരെ കുറവ്

തിരുവനന്തപുരം: സംസ്ഥാനത്ത് ഇന്ന് 6820 പേര്‍ക്ക് കോവിഡ് സ്ഥിരീകരിച്ചു. ഇതില്‍ 5,935 പേര്‍ക്ക് സമ്പര്‍ത്തിലൂടെയാണ് രോഗബാധയേറ്റത്. 26 പേര്‍ കോവിഡ് ബാധയേറ്റ് മരിച്ചു. ഉറവിടം അറിയാത്ത 730 പേരുണ്ട്. 60 പേര്‍ ആരോഗ്യ പ്രവര്‍ത്തകരാണ്. 24 മണിക്കൂറില്‍ 61388 സാമ്പിള്‍ പരിശോധിച്ചു. 7699 പേര്‍ രോഗമുക്തരായി. 84087 പേര്‍ ഇപ്പോള്‍ ചികിത്സയിലുണ്ട്.

കേരളത്തില്‍ ഒരേസമയം ചികിത്സയില്‍ ഇരിക്കുന്ന രോഗികള്‍ പരമാവധി ഒക്ടോബര്‍ 24നായിരുന്നു 97416 പേരായിരുന്നു ചികിത്സയില്‍. ഇതിന് ശേഷം രോഗികളുടെ എണ്ണം ക്രമാനുഗതമായി കുറയുന്നു. ഓരോ ദിവസത്തെയും കണക്ക് തൊട്ടുമുമ്പുള്ള ആഴ്ചയിലെ അതാത് ദിവസത്തെ ആഴ്ചയിലെ കണക്കുമായി താരമത്യം ചെയ്യുമ്പോള്‍ ഒന്ന് മുതല്‍ 10 ശതമാനം വരെ കുറഞ്ഞിട്ടുണ്ടെന്ന് മുഖ്യമന്ത്രി പിണറായി വിജയന്‍ അറിയിച്ചു. ടെസ്റ്റ് പോസിറ്റിവിറ്റി നിരക്ക് 11.01 ശതമാനമായി കുറഞ്ഞതായും മുഖ്യമന്ത്രി പറഞ്ഞു.

രോഗം കുറയുകയാണോ എന്ന തോന്നല്‍ ഉണ്ടായേക്കാം. എന്നാല്‍ അത് അങ്ങനെ അല്ല. മുന്‍കരുതലുകളില്‍ വീഴ്ച വരുത്താനുള്ള സാധ്യതയുണ്ട്. അത് അംഗീകരിക്കാനാകില്ലെന്ന് മുഖ്യമന്ത്രി പറഞ്ഞു.