കേന്ദ്ര സര്‍ക്കാര്‍ ജീവനക്കാര്‍ക്കായി ആയുഷ് ഡേ കെയര്‍ തെറാപ്പി കേന്ദ്രങ്ങള്‍

തിരുവനന്തപുരം: കേന്ദ്ര ഗവണ്‍മെന്റ് ജീവനക്കാര്‍ക്കും വിരമിച്ചവര്‍ക്കുമായി ആയുര്‍വേദ, യോഗ, പ്രകൃതി ചികിത്സ വിഭാഗങ്ങള്‍ക്ക് കീഴില്‍ ഡേകെയര്‍ തെറാപ്പി കേന്ദ്രങ്ങള്‍ ആരംഭിക്കാനുള്ള ശുപാര്‍ശയ്ക്ക് ആരോഗ്യകുടുംബക്ഷേമ മന്ത്രാലയത്തിന്റെ അനുമതി. ആയുര്‍വേദ, യോഗ, പ്രകൃതി ചികിത്സാ വിഭാഗങ്ങളില്‍ പ്രവര്‍ത്തിക്കുന്ന സ്വകാര്യ ഡെകെയര്‍ കേന്ദ്രങ്ങളെ കേന്ദ്ര ഗവണ്‍മെന്റ് ആരോഗ്യ പദ്ധതിക്ക് (സിജിഎച്ച്എസ്) കീഴില്‍ ഉടന്‍തന്നെ ഉള്‍പ്പെടുത്തുന്നതാണ്. സിജി എച്ച്എസ്‌നു കീഴില്‍ അലോപതി ചികിത്സ വിഭാഗത്തിനായി സജ്ജീകരിച്ചിരിക്കുന്ന ഡേകെയര്‍ തെറാപ്പി കേന്ദ്രങ്ങളുടെ മാതൃകയില്‍ ആകും ഇവ.

വിരമിച്ചതോ നിലവില്‍ ജോലി ചെയ്യുന്നതോ ആയ എല്ലാ കേന്ദ്ര ഗവണ്‍മെന്റ് ആരോഗ്യ പദ്ധതി ഗുണഭോക്താക്കള്‍ക്കും ഈ കേന്ദ്രങ്ങളുടെ സേവനം പ്രയോജനപ്പെടുത്താവുന്നതാണ്.

രാജ്യ തലസ്ഥാനമായ ഡല്‍ഹിയില്‍ പരീക്ഷണാടിസ്ഥാനത്തില്‍ ഒരു വര്‍ഷത്തേക്ക് പദ്ധതി നടപ്പാക്കും. തുടര്‍ന്ന് രാജ്യത്തിന്റെ മറ്റു ഭാഗങ്ങളിലേക്ക് ഈ സേവനം വ്യാപിപ്പിക്കുന്നത് പരിഗണിക്കുന്നതാണ്.

സി എച്ച് സി, പി എച്ച് സി, പോളി ക്ലിനിക് തുടങ്ങി, പ്രാദേശിക ഭരണകൂടങ്ങള്‍ക്ക് കീഴില്‍ രജിസ്റ്റര്‍ ചെയ്തതും അംഗീകൃത ആയുഷ് വിദഗ്ധന്റെ മേല്‍നോട്ടത്തില്‍ ശസ്ത്രക്രിയ അടക്കമുള്ള ചികിത്സ സംവിധാനങ്ങള്‍ നടപ്പാക്കുന്നതിനു സൗകര്യം ഉള്ളതുമായ ഇടങ്ങളാണ് ആയുഷ് ഡേ കെയര്‍ കേന്ദ്രങ്ങള്‍. എന്നാല്‍ ഇവിടങ്ങളില്‍ രോഗികളെ കിടത്തി ചികിത്സിക്കാനുള്ള സൗകര്യം ലഭ്യമായിരിക്കുകയില്ല.