പോലീസിന് നേരെ ആക്രമണം; സൈനികന്‍ ഐസ്‌ഐയുടെ കൈയൊടിച്ചു

തിരുവനന്തപുരം: തലസ്ഥാനത്ത് വീണ്ടും പോലീസിന് നേരെ ആക്രമണം. വാഹന പരിശോധനക്കിടെ സൈനികനാണ് പോലീസിനെ ആക്രമിച്ചത്. പൂന്തുറ സ്റ്റേഷനിലെ രണ്ട് എസ്‌ഐമാര്‍ക്ക് പരിക്കേറ്റു. ഒരു എസ്‌ഐയുടെ കൈയൊടിഞ്ഞു. സംഭവത്തില്‍ കെല്‍വിന്‍ വില്‍സ് എന്ന സൈനികനെ പോലീസ് അറസ്റ്റ് ചെയ്തു. വാഹന പരിശോധനയ്ക്കിടെ വനിതാ പോലീസുദ്യോഗസ്ഥയോട് ഇയാള്‍ മോശമായി പെരുമാറിയെന്ന് പോലീസ് പറയുന്നു. അറസ്റ്റ് ചെയ്യാന്‍ ശ്രമിക്കുന്നതിനിടെയാണ് സൈനികന്‍ പോലീസിനെ ആക്രമിച്ചത്.

കഴിഞ്ഞ ദിവസവും തലസ്ഥാനത്ത് പോലീസിന് നേരെ ഗുണ്ടാസംഘങ്ങളുടെ ആക്രമണം നടന്നിരുന്നു. വീടാക്രമിച്ച കേസിലെ പ്രതികളെ പിടികൂടുന്നതിനിടെയായിരുന്നു ആക്രമണം. പോലീസ് വാഹനം ഇടിച്ച് തെറിപ്പിക്കാന്‍ ശ്രമിച്ചു. മൂന്ന് പേരെ ഫോര്‍ട്ട് പോലീസ് അറസ്റ്റ് ചെയ്തു. കമലേശ്വരത്ത് വീടാക്രമിച്ച് മോഷണം നടത്തിയ പ്രതികളെ പിടികൂടാനെത്തിയ പോലീസ് സംഘത്തിന് നേരെയാണ് ആക്രമണമുണ്ടായത്.

വിഷ്ണു, ദീപക് എന്ന ഫിറോസ് , ചന്ദ്രബോസ് എന്നീ പ്രതികള്‍ എസ് എസ് കോവില്‍ റോഡിലെ ബാറില്‍ ഉണ്ടെന്നറിഞ്ഞ് മഫ്ത്തിയില്‍ പോലീസ് എത്തിയപ്പോള്‍ ഇവര്‍ പുറത്തിറങ്ങി കാറില്‍ രക്ഷപ്പെടാന്‍ ശ്രമിച്ചു. ഇതിനിടെ പോലീസ് ജീപ്പ് ഇവരെ തടഞ്ഞു. പ്രതികള്‍ സഞ്ചരിച്ച കാര്‍ പോലീസ് ജീപ്പില്‍ കൊണ്ടിടിച്ചു. കാറുമായി വീണ്ടും രക്ഷപ്പെടാന്‍ ശ്രമിച്ച ഇവരെ പോലീസ് വളഞ്ഞ് സഹാസികമായി ഗ്ലാസ് തകര്‍ത്താണ് പിടികൂടിയത.