കോവിഡ് ആശങ്ക : ജനുവരി മൂന്നു മുതല്‍ അബുദാബി സ്‌കൂളുകള്‍ വീണ്ടും ഓണ്‍ലൈന്‍ ക്ലാസുകളിലേക്ക്

കോവിഡ് കേസുകളുടെ എണ്ണം ക്രമാതീതമായി ഉയരുന്ന സാഹചര്യത്തില്‍ സ്‌കൂളുകളും കോളേജുകളും വീണ്ടും ഓണ്‍ലൈന്‍ ക്ലാസുകളിലേക്ക് മാറുന്നു.

അബുദാബി :ഹൈബ്രിഡ് രീതിയില്‍ ക്ലാസുകള്‍ കൈകാര്യം ചെയ്തു വന്നിരുന്ന സ്‌കൂളുകളും കോളേജുകളും ജനുവരി മൂന്നുമുതല്‍ രണ്ടാഴ്ച കാലം ഓണ്‍ലൈന്‍ ക്ലാസുകളിലേക്ക് പൂര്‍ണമായും മാറാനാണ് തീരുമാനം.

പല സ്‌കൂളുകളും കോളേജുകളും ജനുവരി മൂന്നു മുതല്‍ പൂര്‍ണമായും ക്യാംപസ് പഠന രീതിയിലേക്ക് മാറുമെന്ന് അറിയിച്ചിരുന്നു. എന്നാല്‍, കഴിഞ്ഞ രണ്ടാഴ്ചയായി ദിവസേനയുള്ള കോവിഡ് രോഗികളുടെ എണ്ണം ക്രമാതീതമായി ഉയരുന്ന സാഹചര്യത്തിലാണ് ഓണ്‍ലൈന്‍ ക്ലാസുകളിലേക്ക് അദ്ധ്യാപനം മാറാന്‍ അധികൃതര്‍ തീരുമാനിച്ചത്.

അതേസമയം, ദുബായ് സ്‌കൂളുകള്‍ മുന്‍ നിശ്ചയിച്ച പ്രകാരം ജനുവരി മൂന്നു മുതല്‍ ക്ലാസുകളില്‍
എത്തിയുള്ള പഠനം തുടങ്ങുമെന്ന് കെഎച്ച്ഡിഎ അറിയിച്ചു. എന്നാല്‍, സംഘം ചേര്‍ന്ന് ഇരിക്കുന്നതിനും ഫീല്‍ഡ് ട്രിപ്, പാഠ്യേതര വിഷയങ്ങളിലെ പരിശീലനങ്ങള്‍ എന്നിവ ഉണ്ടായിരിക്കില്ലെന്നും ദുബായ് സ്‌കൂളുകളുടെ മേല്‍നോട്ടം വഹിക്കുന്ന കെഎച്ച്ഡിഎ അറിയിച്ചു.

അബുദാബിയിലെ സ്‌കൂളുകളുടെ പ്രഖ്യാപനം വന്ന സാഹചര്യത്തിലാണ് ദുബായ് മീഡിയ ഓഫീസ് പുതിയ വിശദീകരണം പുറത്തുവിട്ടത്.

കഴിഞ്ഞ മൂന്നു ദിവസമായി  രാജ്യത്തെ പ്രതിദിന രോഗികളുടെ എണ്ണം ആയിരത്തി അഞ്ഞൂറിനു മുകളിലാണ്.

സ്‌കൂള്‍, സര്‍വകലാശാലകള്‍ ഇതര ട്രെയിനിംഗ് ഇന്‍സ്റ്റിറ്റ്യൂട്ടുകള്‍ എന്നിവയ്ക്ക് പുതിയ ഉത്തരവ് ബാധകമാണെന്ന് സര്‍ക്കാര്‍ വൃത്തങ്ങള്‍ അറിയിച്ചു.

രണ്ടാഴ്ചക്ക് ശേഷം അതാത് എമിറേറ്റുകളിലെ ദുരന്തനിവാരണ സമിതി യോഗം ചേര്‍ന്ന് സ്ഥിതിഗതികള്‍ വിലയിരുത്തിയ ശേഷം ഓണ്‍ലൈന്‍ ക്ലാസുകള്‍ തുടരുന്ന കാര്യത്തില്‍ അന്തിമ തീരുമാനം എടുക്കും.