യുപിയില്‍ അങ്കത്തിനൊരുങ്ങി ആംആദ്മി; അടുത്ത തെരഞ്ഞെടുപ്പില്‍ മത്സരിക്കുമെന്ന് അരവിന്ദ് കെജ്രിവാള്‍

ഡല്‍ഹി: 2022 ല്‍ ഉത്തര്‍പ്രദേശില്‍ നടക്കുന്ന നിയമസഭാ തെരഞ്ഞെടുപ്പില്‍ ആംആദ്മി പാര്‍ട്ടി മത്സരിക്കുമെന്ന് അരവിന്ദ് കെജ്രിവാള്‍. വാര്‍ത്താ സമ്മേളനത്തിലയിരുന്നു കെജ്രിവാളിന്റെ സുപ്രധാനമായ പ്രഖ്യാപനം. യുപി സര്‍ക്കാരിന്റെ കോവിഡ് പ്രതിരോധ നടപടികള്‍ പാളിപോയെന്നും സ്ത്രീതകള്‍ക്ക് സുരക്ഷയില്ലാത്ത സംസ്ഥാമായി ഉത്തര്‍പ്രദേശ് മാറിയെന്നും അദ്ദേഹം ആരോപിച്ചു. ആംആദ്മി പാര്‍ട്ടി ഡല്‍ഹിയില്‍ മൂന്ന് തവണ സര്‍ക്കാര്‍ രൂപീകരിച്ചെന്നും പഞ്ചാബില്‍ ശക്തരായ പ്രതിപക്ഷമാകാന്‍ പാര്‍ട്ടിക്ക് സാധിച്ചെന്നും ഇനി അടുത്ത ലക്ഷ്യം യുപി ആണെന്നായിരുന്നു കെജ്രിവാള്‍ പറഞ്ഞത്.

ഇന്ത്യയിലെ ഏറ്റവും വലിയ സംസ്ഥാനമായ യുപിയില്‍ ഇതുവരെ വികസനം എത്തിയിട്ടില്ല. ആരോഗ്യരംഗത്തും വിദ്യാഭ്യാസ മേഖലയിലും എല്ലാം പിറകിലാണ്. അതുകൊണ്ട് തന്നെ ഡല്‍ഹി മോഡല്‍ വികസനമാണ് ആം ആദ്മി യു.പിയില്‍ മുന്നോട്ട് വെയ്ക്കുന്നതെന്നും അദ്ദേഹം പറഞ്ഞു. ഭരണത്തിലെത്തിയാല്‍ മൊഹല്ല ക്ലിനിക്, വൈദ്യുതി നിരക്കിലെ ഇളവുകള്‍, സ്ത്രീകള്‍ക്ക് സൗജന്യ യാത്ര എന്നിവ നല്‍കുമെന്നും കെജ്രിവാള്‍ വ്യക്തമാക്കി.

അതേസമയം കഴിഞ്ഞ രണ്ട് ലോക്‌സഭാ തെരഞ്ഞെടുപ്പുകളിലും നിയമസഭാ തെരഞ്ഞെടുപ്പിലും മെച്ചപ്പെട്ട പ്രകടനമായിരുന്നില്ല ആംആദ്മി പാര്‍ട്ടി യുപിയില്‍ നടത്തിയത്. 2014 ല്‍ പ്രധാനമന്ത്രി നരേന്ദ്രമോദിക്കെതിരെ കെജ്രിിവാള്‍ വരാണസിയില്‍ മല്‍സരിച്ചെങ്കിലും മൂന്ന് ലക്ഷത്തിലധികം വോട്ടുകള്‍ക്ക് പരാജയപ്പെടുകയായിരുന്നു. 2017ലെ നിയമസഭാ തെരഞ്ഞെടുപ്പില്‍ ഡല്‍ഹിയില്‍ നിന്നെത്തിയ പ്രവര്‍ത്തകരായിരുന്നു പാര്‍ട്ടിക്ക് വേണ്ടി യുപിയില്‍ പ്രചാരണം നടത്തിയത്.