രാജ്യത്ത് കോവിഡ്​ ബാധിതര്‍ 14 ലക്ഷത്തിലേക്ക്​; പുതുതായി 48,661 പേര്‍ക്ക്​​ രോഗബാധ

ന്യൂഡല്‍ഹി: ഇന്ത്യയില്‍ പ്രതിദിനം റിപോര്‍ട്ട്​ ചെയ്യപ്പെടുന്ന കോവിഡ്​ കേസുകളുടെ എണ്ണം അരലക്ഷത്തോടടുക്കുന്നു. 24 മണിക്കൂറിനി​ടെ 48,661 പേര്‍ക്കാണ്​ രോഗബാധ സ്​ഥിരീകരിച്ചത്​. ഇതോടെ കോവിഡ്​ ബാധിതരുടെ എണ്ണം 13.85 ലക്ഷത്തിലെത്തി.

705 പേരാണ്​ കഴിഞ്ഞ ദിവസം രോഗം ബാധിച്ച്‌​ മരണത്തിന്​ കീഴടങ്ങിയത്​. ഇതോടെ ഇന്ത്യയില്‍ ആകെ കോവിഡ്​ മരണങ്ങളുടെ എണ്ണം 31,358 ആയി. നാലരലക്ഷം ആളുകള്‍ നിലവില്‍ ചികിത്സയിലുണ്ട്​. 8,49,432 പേര്‍ രോഗമുക്തി നേടിയതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. ശനിയാഴ്​ച മാത്രം 4,42,263 സാംപിളുകള്‍ പരിശോധിച്ചതായി ഐ.സി.എം.ആര്‍ അറിയിച്ചു.

ജൂലൈ 23ന്​ ശേഷം പ്രതിദിനം 40,000 ത്തിലധികം കേസുകളാണ്​ രാജ്യത്ത്​ റിപോര്‍ട്ട്​ ചെയ്യുന്നത്​. മഹാരാഷ്​ട്രയാണ്​ മഹാമാരി ഏറ്റവും രൂക്ഷമായി ബാധിച്ച സംസ്​ഥാനം. 1.4 ലക്ഷം രോഗികളുള്ള സംസ്​ഥാനത്ത്​ 13,132 പേരാണ്​ മരിച്ചത്​. 53,132 കേസുകളും 3320 മരണങ്ങളുമായി തമിഴ്​നാടാണ്​ രണ്ടാമതുള്ളത്​. എന്നാല്‍ ഡല്‍ഹിയില്‍ നിന്നും ശുഭസൂചനകളാണ്​ വരുന്നത്​. നിലവില്‍ 14000 പേര്‍ മാത്രമാണ്​ ഡല്‍ഹിയില്‍ ചികിത്സയിലുള്ളത്​. 1.10 ലക്ഷം ആളുകളാണ്​ രോഗമുക്തി നേടിയത്.

രോഗബാധിതരുടെ എണ്ണം ക്രമാതീതമായി വര്‍ധിക്കുന്ന സാഹചര്യത്തില്‍ സംസ്​ഥാനങ്ങള്‍ ലോക്​ഡൗണ്‍ നിയന്ത്രണങ്ങള്‍ കര്‍ശനമാക്കുകയാണ്​. ചില സംസ്​ഥാനങ്ങള്‍ പൂര്‍ണമായും ലോക്​ഡൗണ്‍ പ്രഖ്യാപിച്ചപ്പോള്‍ ചില ഇടങ്ങളില്‍ കണ്ടെയന്‍മെന്റെ് ​മേഖലകളില്‍ നിയന്ത്രണം കര്‍ശനമാക്കി. കോവിഡ്​ പശ്ചാത്തലത്തില്‍ ത്രിപുരയില്‍ മൂന്ന്​ ദിവസത്തെ സമ്പൂര്‍ണ ലോക്​ഡൗണ്‍ പ്രഖ്യാപിച്ചു.