സൗദി ഇന്ത്യൻ എംബസിയിലും കോൺസുലേറ്റിലും റിപ്പബ്ലിക് ദിനാഘോഷം സംഘടിപ്പിച്ചു.

റിയാദ് / ജിദ്ദ : ഇന്ത്യയുടെ റിപ്പബ്ലിക് ദിനാഘോഷം റിയാദിലെ ഇന്ത്യൻ എംബസിയിലും ജിദ്ദ ഇന്ത്യൻ കോൺസുലേറ്റിലും സംഘടിപ്പിച്ചു. എംബസിയിലെ ആഘോഷങ്ങൾക്ക് സ്ഥാനപതി ഡോ. സുഹൈൽ അജാസ് ഖാൻ നേതൃത്വം നൽകി. രാവിലെ എട്ടിന്​ എംബസി അങ്കണത്തിൽ പതാക ഉയർത്തൽ ചടങ്ങോടെയാണ് ആഘോഷ പരിപാടികൾക്ക് തുടക്കം കുറിച്ചത്. തുടർന്ന്, മഹാത്മാ ഗാന്ധിയുടെ പ്രതിമക്ക് മുന്നിൽ പുഷ്പാർച്ചന നടത്തി.ചടങ്ങിൽ രാഷ്​ട്രപതി ദ്രൗപദി മുർമുവിന്‍റെ റിപ്പബ്ലിക് ദിന സന്ദേശം അംബാസഡർ വായിച്ചു. റിയാദിലെ ഇന്ത്യൻ സ്കൂളിലെയും ഇന്ത്യൻ പബ്ലിക് സ്കൂളിലെയും വിദ്യാർഥികൾ നൃത്ത പരിപാടി അവതരിപ്പിച്ചു. ഇന്ത്യൻ സമൂഹം ഉൾപ്പെടെ വിവിധ പ്രദേശങ്ങളിൽനിന്നുള്ള നിരവധി പ്രവാസികൾ ചടങ്ങിൽ പങ്കെടുത്തു.
അതേസമയം ജിദ്ദയിലെ കോൺസുലേറ്റ് അങ്കണത്തിൽ നടന്ന പരിപാടിയിൽ കോൺസൽ ജനറൽ ഫഹദ് അഹമ്മദ് ഖാന്‍ സൂരി ദേശീയ പതാക ഉയർത്തി. രാഷ്ട്രപതി ദ്രൗപതി മുർമുവിന്റെ സന്ദേശത്തിൽ നിന്നുള്ള പ്രസക്ത ഭാഗങ്ങൾ വായിച്ചു.ഇന്ത്യൻ പ്രവാസികൾക്ക് കോൺസൽ ജനറൽ റിപ്പബ്ലിക് ദിന ആശംസകൾ നേർന്നു. ഇന്ത്യയും സൗദിയും തമ്മിലുള്ള ബന്ധം ശക്തിപ്പെടുത്തുന്നതിന് സൗദി സർക്കാരിന്‍റെ തുടർച്ചയായ പിന്തുണയ്‌ക്ക് കോൺസുൽ ജനറൽ നന്ദി അറിയിച്ചു. പ്രസ് ആൻഡ് ഇൻഫോർമേഷൻ കോണ്‍സല്‍ മുഹമ്മദ് ഹാഷിം ചടങ്ങ് നിയന്ത്രിച്ചു. കേന്ദ്ര ഹജ് കമ്മിറ്റി ചെയർമാൻ എ.പി അബ്ദുള്ളക്കുട്ടി, വിവിധ കോണ്‍സല്‍മാര്‍, അവരുടെ കുടുംബാംഗങ്ങൾ, കോണ്‍സുലേറ്റ് ഉദ്യോഗസ്ഥര്‍, വിവിധ ഇന്ത്യൻ സംഘടനാ നേതാക്കള്‍ തുടങ്ങി നിരവധി പേര്‍ ആഘോഷ പരിപാടികളില്‍ പങ്കെടുത്തു.