വിശ്വാസത്തെ ചോദ്യം ചെയ്യുന്നവര്‍ക്ക് തിരിച്ചടി ; ഇടത് നേതാക്കള്‍ക്ക് എന്‍എസ്എസിന്റെ മുന്നറിയിപ്പ്

എന്‍എസ്എസിന്റെ നിലപാട് വിശ്വാസവും ആചാരാനുഷ്ഠാനവും സംരക്ഷിക്കുക എന്നതാണെന്നും ഏതെങ്കിലും രാഷ്ട്രീയ നിലപാടിന്റെ അടിസ്ഥാനത്തിലല്ല അതിനുവേണ്ടി ആദ്യം മുതല്‍ ഇറങ്ങി തിരിച്ചതെന്നും ജനറല്‍ സെക്രട്ടറി

തിരുവനന്തപുരം : ശബരിമല വിഷയത്തില്‍ ഇടത് നേതാക്കളുടെ പ്രതികരണം അതിര് കടക്കുന്നുവെന്ന് എന്‍എസ്എസ്. വിശ്വാസം ജീവവായു ആണെന്നും ഇത് മറക്കുന്നവര്‍ക്ക് തിരിച്ചടി ഉണ്ടാകുമെന്ന് ഇടത് നേതാക്കള്‍ക്ക് എന്‍എസ്എസിന്റെ മുന്നറിയിപ്പ് നല്‍കി. എന്‍എസ്എസ് എന്നും വിശ്വാസം സംരക്ഷിക്കുന്നവര്‍ക്കൊപ്പമാണ്. അതില്‍ രാഷ്ട്രീയമില്ല. സ്ഥാനമാനങ്ങള്‍ക്ക് വേണ്ടി ഏതെങ്കിലും സര്‍ക്കാരുകളുടെ പടിവാതിക്കല്‍ പോയിട്ടില്ലെന്നും എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായര്‍ പ്രസ്താവനയില്‍ പറഞ്ഞു.

വിശ്വാസവും ആചാരാനുഷ്ഠാനവും സംരക്ഷിക്കുക എന്നതാണ് എന്‍എസ്എസിന്റെ നിലപാട്.ഏതെങ്കിലും രാഷ്ട്രീയ നിലപാടിന്റെ അടിസ്ഥാന ത്തിലല്ല അതിനുവേണ്ടി ആദ്യം മുതല്‍ ഇറങ്ങി തിരിച്ചത്. എന്‍എസ്എസിനോ നേതൃത്വത്തിലുള്ളവര്‍ക്കോ പാര്‍ലമെന്ററി മോഹങ്ങളൊന്നും തന്നെയില്ല. സ്ഥാനങ്ങള്‍ക്കോ രാഷ്ട്രീയ നേട്ടങ്ങള്‍ക്കോ വേണ്ടി ഏതെങ്കിലും സര്‍ക്കാരുകളുടെയോ രാഷ്ട്രീയ നേതാക്കളുടെയോ പടിവാതിക്കള്‍ പേയിട്ടില്ലെന്നും എന്‍എസ്എസ് പ്രസ്താവനയില്‍ വ്യക്തമാക്കി.

അധികാരത്തിന്റെ തണലില്‍ വിശ്വാസ സംരക്ഷണം ചിലര്‍ മറന്നുപോകുന്നു. അതിന്റേതായ തിരിച്ചടിയുണ്ടാകുമെന്നാണ് എന്‍എസ്എസിന്റെ മുന്നറിയിപ്പ്. എന്‍എസ്എസിനെതിരായ വിമര്‍ശനങ്ങളെ അര്‍ഹിക്കുന്ന അവഗണനയോടെ തള്ളിക്കളയുകയാണെന്നും ജി സുകുമാരന്‍ നായര്‍ വ്യക്തമാക്കി.