യുഎഇയുടെ പുതിയ .പുനഃ ചംക്രമണ പദ്ധതി -ഭക്ഷ്യ മാലിന്യം ഇനി കാലീത്തീറ്റ

പാരിസ്ഥിതിക ബാധ്യത ഇനി സാമ്പത്തിക സ്രോതസ്.
ഫുഡ് വേസ്റ്റ് ടു ഫീഡ് -ഗള്‍ഫിലെ ആദ്യത്തെ പദ്ധതിയുമായി യുഎഇ

അബുദാബി  : ഗള്‍ഫിലെ ആദ്യത്തെ ഭക്ഷ്യ പുനചംക്രമണ പദ്ധതിക്ക് യുഎഇയും സിര്‍ക ബയോടെകും കരാര്‍ ഒപ്പുവെച്ചു.

പ്രതിമാസം ഒന്നര ടണ്‍ ജൈവ വളം ഉത്പാദിപ്പിക്കുന്നതാണ് പദ്ധതി. യുഎഇയുടെ പരിസ്ഥിതി കാലാവസ്ഥ വ്യതിയാന വകുപ്പ് മന്ത്രി മറിയം ബിന്ത് മൊഹമദ് അല്‍ മെഹ്‌റിയാണ് പദ്ധതിക്ക് തുടക്കമിട്ടത്.

ഭക്ഷ്യ മാലിന്യം ജൈവ എണ്ണ, വളം, കാലിത്തീറ്റ എന്നിവയാക്കിമാറ്റുന്ന പദ്ധതിയാണിത്.

സിര്‍ക ബയോടെക് എന്ന സ്റ്റാര്‍ട്അപ് കമ്പനിയാണ് ബ്ലാക് സോള്‍ഡിയര്‍ ഫ്‌ളൈ എന്ന ഒരു ലാര്‍വയെ ഉപയോഗിച്ച് ഭക്ഷ്യ മാലിന്യങ്ങളെ മൃഗപോഷകാഹാരമാക്കി മാറ്റുന്നത്. ഇത് ജൈവ വളവും എണ്ണയുമാക്കിമാറ്റും.

അബുദാബിയിലെ മസ്ദര്‍ സിറ്റിയില്‍ നടന്ന ചടങ്ങിലാണ് യുഎഇയും ബയോടെക് കമ്പനിയും തമ്മില്‍ കരാര്‍ ഒപ്പുവെച്ചത്.

ജൈവ മാലിന്യം വര്‍ദ്ധിച്ചുവരുന്ന സാഹചര്യത്തില്‍ ഇതിനുള്ള പ്രകൃതിദത്തമായ പരിഹാരം കാണുക എന്നതായിരുന്നു യുഎഇ നേരിടുന്ന വെല്ലുവിളി.

പാരിസ്ഥിതിക ബാധ്യതയെ സാമ്പത്തിക ഉറവിടമാക്കി മാറ്റുന്നതിനുള്ള പദ്ധതിയെന്ന നിലയില്‍ ഇതിന് വലിയ പ്രാധാന്യമാണ് യുഎഇ സര്‍ക്കാര്‍ നല്‍കിയിട്ടുള്ളതെന്നും മന്ത്രി പറഞ്ഞു.