മലിനജലം കുടിച്ച് രണ്ടുപേര്‍ മരിച്ചു, 45 പേര്‍ ആശുപത്രിയില്‍, 10 പേരുടെ നില ഗുരുതരം ; സംഭവം കേന്ദ്ര ജലശക്തി മന്ത്രിയുടെ മണ്ഡലത്തില്‍

മധ്യപ്രദേശിലെ ദാമോയില്‍ മലിനജലം കുടിച്ച് രണ്ട് പേര്‍ മരിച്ചു. കേന്ദ്ര ജലശക്തി സഹമന്ത്രി പ്രഹ്ലാദ് സിംഗ് പട്ടേലിന്റെ മണ്ഡലത്തിലെ കാഞ്ചാരി പാടി ഗ്രാമത്തിലാണ് സംഭവം

ഭോപ്പാല്‍ : മധ്യപ്രദേശിലെ ദാമോയില്‍ മലിനജലം കുടിച്ച് രണ്ട് പേര്‍ മരിച്ചു. കേന്ദ്ര ജലശക്തി സഹമന്ത്രി പ്രഹ്ലാദ് സിംഗ് പട്ടേലിന്റെ മണ്ഡലത്തിലെ കാഞ്ചാരി പാടി ഗ്രാമത്തിലാണ് സംഭവം. 70 വയസ്സുള്ള ആളും ഒരു യുവതിയുമാണ് മരിച്ചത്.

കിണറില്‍ നിന്നുള്ള വെള്ളം കുടിച്ചതാണ് ദുരന്തത്തിന് കാരണമായത്. ആരോഗ്യ പ്രശ്നങ്ങളെ തുടര്‍ന്ന് 45 പേരെ ആശുപത്രിയില്‍ പ്രവേശിപ്പിച്ചു. ഇതില്‍ 10 പേരുടെ നില ഗുരുതരമാണ്. ഇവരെ ദാമോഹി ജില്ലാ ആശുപത്രിയിലേക്ക് മാറ്റി.

വിവരമറിഞ്ഞ ഉടന്‍ തന്നെ ജില്ലാ മെഡിക്കല്‍ ഓഫീസറുടെ നേതൃത്വത്തില്‍ ആരോഗ്യസംഘം ഗ്രാമത്തി ലെത്തിയിട്ടുണ്ട്. കിണറിലെ വെള്ളം കുടിച്ച ഗ്രാമത്തിലെ നിരവധി പേര്‍ക്ക് വയറിന് അസുഖം ബാധിച്ച തായി റിപ്പോര്‍ട്ടുകളുണ്ട്.