ബ്‌ളാസ്‌റ്റേഴ്‌സിന് ബൂട്ടണിയാൻ റിത്വിക് കുമാർദാസ്

കൊച്ചി: ഇന്ത്യൻ സൂപ്പർ ലീഗിലെ അടുത്ത സീസണിൽ 23 കാരനായ മിഡ്ഫീൽഡർ റിത്വിക് കുമാർ ദാസ് കേരള ബ്ലാസ്റ്റേഴ്‌സിനായി ബൂട്ടണിയും.  ആക്രമണാത്മക മിഡ്ഫീൽഡറായി കളിക്കാൻ കഴിയുന്ന ബഹുമുഖ വിംഗറായ റിത്വിക് റിയൽ കശ്മീർ എഫ്.സിയിൽ നിന്നാണ് ബ്‌ളാസ്‌റ്റേഴ്‌സിലെത്തിയത്.
റിയൽ കാശ്മീരിനായി അദ്ദേഹം 11 മത്സരങ്ങൾ കളിച്ചിട്ടുണ്ട. ആറു മത്സരങ്ങളിൽ ആദ്യ ഇലവനിൽ കളിച്ചു. ഐ.ലീഗ് സീസണിൽ രണ്ട് അസിസ്റ്റുകൾ സംഭാവന ചെയ്തിട്ടുണ്ട്.  പശ്ചിമ ബംഗാളിലെ ബർൺപൂരിൽ നിന്നുള്ള റിത്വിക് മോഹൻ ബഗൻ അക്കാദമിയിൽ പരിശീലനം നേടി.  സി.എഫ്.എൽ ഫസ്റ്റ് ഡിവിഷനിലെ കൊൽക്കത്ത കസ്റ്റംസിൽ തന്റെ ഫുട്ബാൾ ജീവിതം ആരംഭിച്ചു. കൊൽക്കത്ത പ്രീമിയർ ഡിവിഷൻ ഗ്രൂപ്പ് ബിയിൽ കാളിഘട്ട് എഫ്.സിക്കായി കളിച്ചു.  2018 ഡിസംബറിൽ ഐ ലീഗിൽ  അരങ്ങേറ്റം കുറിച്ച അദ്ദേഹം വേഗതയും പന്തിലുള്ള മികച്ച നിയന്ത്രണവും കഴിവും കൊണ്ട് ശ്രദ്ധ നേടി.
‘കേരള ബ്ലാസ്റ്റേഴ്‌സ് എഫ്.സിയിലൂടെ  ഐ.എസ്.എല്ലിൽ അരങ്ങേറ്റം കുറിക്കാൻ അവസരം ലഭിച്ചതിൽ സന്തോഷമുണ്ട്. കരിയറിലെ സുപ്രധാന വഴിത്തിരിവാണിത്.  ടീമിന് എന്റെ പരമാവധി നൽകാനും  ആരാധകർക്ക് സന്തോഷം നൽകാനും ആഗ്രഹിക്കുന്നു. ‘ റിത്വിക് പറഞ്ഞു.
‘യുവപ്രതിഭകളെ തിരിച്ചറിയുന്നതിലും  വികസിപ്പിക്കുന്നതിലും കേരള ബ്ലാസ്റ്റേഴ്‌സ് ശ്രദ്ധിക്കുന്നുണ്ട്. ചെറുപ്പക്കാരും പ്രഗത്ഭരുമായ കളിക്കാർക്ക് ക്ലബ് ഏറ്റവും കൂടുതൽ അവസരങ്ങൾ നൽകിയിട്ടുണ്ട്.’  കേരള ബ്ലാസ്റ്റേഴ്‌സ് സ്‌പോർട്ടിംഗ് ഡയറക്ടർ കരോലിസ് സ്‌കിൻകിസ് പറയുന്നു.