ധര്‍മ്മടത്ത് ഹൈക്കമാന്‍ഡ് തീരുമാനം നടപ്പിലായില്ല ; പാര്‍ട്ടി തീരുമാനത്തിന് കാത്ത് നില്‍ക്കാതെ ഡിസിസി സെക്രട്ടറി പത്രിക നല്‍കി

ധര്‍മ്മടത്ത് മുഖ്യമന്ത്രി പിണറായി വിജയനെതിരെ കരുത്തനായ സ്ഥാനാര്‍ത്ഥി വേണമെന്നായിരുന്നു ഹൈക്കമാന്‍ഡ് നിര്‍ദേശം. എന്നാല്‍ പാര്‍ട്ടി ഉന്നതാധികാര സമിതിയുടെ തീരുമാനവും നടപ്പിലായില്ല

കണ്ണൂര്‍ : ധര്‍മ്മടത്ത് മുഖ്യമന്ത്രി പിണറായി വിജയനെതിരെ മത്സരിക്കാനില്ലെന്ന് വ്യക്തമാക്കി കെ.പി.സി.സി ആക്ട്ടിങ് പ്രസിഡന്റ് കെ.സുധാകരന്‍ എംപി പിന്മാറിയതിന് തൊട്ട് പിന്നാലെ ഡിസിസി സെക്രട്ടറി സി.രഘുനാഥ് നാമനിര്‍ദേശ പത്രിക നല്‍കി. രഘുനാഥിനെ കോണ്‍ഗ്രസ് ഔദ്യോഗികമായി പ്രഖ്യാപിക്കും മുമ്പാണ് പത്രിക നല്‍കിയത്. ധര്‍മ്മടത്ത് മുഖ്യമന്ത്രി പിണറായി വിജയനെതിരെ കരുത്തനായ സ്ഥാനാര്‍ത്ഥി വേണമെന്നായിരുന്നു ഹൈക്കമാന്‍ഡ് നിര്‍ദേശം. എന്നാല്‍ പാര്‍ട്ടി ഉന്നതാധികാര സമിതിയുടെ തീരുമാനവും നടപ്പിലായില്ല.

പാര്‍ട്ടി തീരുമാനത്തിന് കാത്ത് നില്‍ക്കാതെ ഡിസിസി സെക്രട്ടറി ഇന്ന്് ഉച്ചക്ക് ശേഷം പത്രിക സമര്‍പ്പിക്കുകയായിരുന്നു. ധര്‍മ്മടത്ത് കെ സുധാകരന്‍ സ്ഥാനാര്‍ഥിയാകുമെന്ന് അഭ്യൂഹം ഉണ്ടായിരുന്നെങ്കിലും, അദ്ദേഹം മത്സരിക്കാന്‍ ഇല്ലെന്ന് വ്യക്തമാക്കിയിരുന്നു. മല്‍സരിക്കാന്‍ ആഗ്രഹമു ണ്ടെങ്കിലും കണ്ണൂരിലെ യുഡിഎഫിന്റെ ജയത്തെ ബാധിക്കുമെന്നായിരുന്നു സുധാകരന്റെ വാദം. രഘുനാഥ് മല്‍സരിക്കട്ടെയെന്നാണ് കെ സുധാകരനും, കണ്ണൂര്‍ ഡിസിസി നേതൃത്വവും കെപിസിസിക്ക് മുന്നില്‍ നിര്‍ദേശം വെച്ചത്.

നേരത്തെ മുഖ്യമന്ത്രിക്കെതിരെ ധര്‍മ്മടത്ത് മല്‍സരിക്കുമെന്ന് പ്രഖ്യാപിച്ച വാളയാറിലെ കുട്ടികളുടെ അമ്മയെ പിന്തുണയ്ക്കാന്‍ കോണ്‍ഗ്രസ് ആലോചിച്ചിരുന്നു.എന്നാല്‍ മുഖ്യമന്ത്രിക്കെതിരെ കോണ്‍ഗ്രസ് സ്ഥാനാര്‍ത്ഥി ധര്‍മ്മടത്തു വേണമെന്നും, അല്ലെങ്കില്‍ റിബല്‍ ആയി മല്‍സരിക്കുമെന്നും രഘുനാഥ് വ്യക്തമാക്കിയിരുന്നു.

ധര്‍മടത്ത് മത്സരിക്കുന്നതിന് കോണ്‍ഗ്രസ് സാധ്യതാലിസ്റ്റില്‍ ഒന്നുരണ്ടു പേരേ തുടക്കത്തിലുണ്ടായിരുന്നുള്ളൂ. അവസാനം ഒന്നുമാത്രമായി. കെ.സുധാകരനുള്ളവര്‍ രഘുനാഥിനെയാണ് പിന്തുണച്ചത്. ധര്‍മടത്തെ യുഡിഎഫ് സ്ഥാനാര്‍ത്ഥി പ്രഖ്യാപനം നീളുന്നതില്‍ മണ്ഡലത്തിലെ പ്രാദേശിക കോണ്‍ഗ്രസ് നേതാക്കള്‍ പ്രതിഷേധവുമായായി രംഗത്തെത്തിയിരുന്നു.പാര്‍ട്ടിയുടെ നയത്തില്‍ പ്രതിഷേധിച്ച് മെഹറൂഫ് എന്ന കോണ്‍ഗ്രസ് നേതാവ് വിമതനായി പത്രിക നല്‍കാനും തിരുമാനിച്ചു