കേരളത്തിൽ നടന്നത് സർക്കാർ വക പിൻവാതിൽ നിയമനമേള : വിഎം സുധീരൻ ശബരീനാഥൻ മികച്ച ഭൂരിപക്ഷത്തിൽ വിജയിക്കും

ആര്യനാട് : സംസ്ഥാന സർക്കാരിന്റെ നേതൃത്വത്തിൽ കേരളത്തിൽ നടന്നത് പിൻവാതിൽ നിയമനമേളയെന്ന് മുൻ കെപിസിസി പ്രസിഡന്റ്‌ വി.എം.സുധീരൻ. യുഡിഎഫ് അരുവിക്കര നിയോജകമണ്ഡലം തെരഞ്ഞെടുപ്പ് കൺവെൻഷൻ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പരീക്ഷയെഴുതി റാങ്ക് ലിസ്റ്റിൽ ഉൾപ്പെട്ട കുട്ടികൾ അർഹതപ്പെട്ട ജോലിക്കായി ഭരണസിരാ കേന്ദ്രത്തിന് മുന്നിൽ മുട്ടിലിഴയേണ്ട സാഹചര്യമാണ് ഇപ്പോൾ ഉണ്ടായിരിക്കുന്നത്. കേരളത്തിലെ യുവജനങ്ങളെ ഇത്രമേൽ വഞ്ചിച്ച സർക്കാർ സംസ്ഥാന ചരിത്രത്തിൽ ഉണ്ടായിട്ടില്ലെന്നും സർക്കാരിന്റെ യുവജന വഞ്ചനക്കെതിരെയുള്ള വിധിയെഴുത്താകും ഈ തെരെഞ്ഞെടുപ്പെന്നും അദ്ദേഹം പറഞ്ഞു.

കേരള മുഖ്യമന്ത്രിയുടെ ഓഫീസ് സ്വർണ്ണക്കടത്ത്, കള്ളക്കടത്ത്കാരുടെ വിഹാര കേന്ദ്രമാക്കി മാറ്റിയെന്നും നാണംകെട്ട ഭരണത്തെ പിടിച്ചു പുറത്താക്കാൻ ജനങ്ങൾ കാത്തിരിക്കുകയാണെന്നും അദ്ദേഹം പറഞ്ഞു. കേന്ദ്ര – സംസ്ഥാന സർക്കാരുകൾ സാധാരണക്കാരുടെ ജനജീവിതം ദുസ്സഹമാക്കുകയാണെന്നും പെട്രോൾ – ഡീസൽ വില കുതിച്ചുയരുമ്പോൾ ഇരു സർക്കാരുകളും മൗനം പാലിക്കുകയാണെന്നും അദ്ദേഹം കുറ്റപ്പെടുത്തി.

നിയമസഭയുടെ അന്തസ്സ് ഉയർത്തിപ്പിടിച്ച ജനപ്രതിനിധിയാണ് ശബരീനാഥനെന്നും കേരളത്തിൽ ശബരീനാഥനെ പോലുള്ള വ്യക്തികളാണ് നിയമസഭയിൽ എത്തേണ്ടതെന്നും അദ്ദേഹം പറഞ്ഞു. അനീതിക്കെതിരെ ജ്വലിക്കുന്ന ശബ്ദമായി മാറിയ യുവജന നേതാവ് കൂടിയാണ് ശബരിയെന്നും വിഎം സുധീരൻ അഭിപ്രായപ്പെട്ടു.

യുഡിഎഫ് അരുവിക്കര നിയോജകമണ്ഡലം ചെയർമാൻ കുറ്റിച്ചൽ വേലപ്പൻ അധ്യക്ഷത വഹിച്ചു. അഡ്വ. അടൂർ പ്രകാശ് എംപി, മുൻ നിയമസഭ സ്പീക്കർ എൻ.ശക്തൻ, കെപിസിസി ജനറൽ സെക്രട്ടറി പാലോട് രവി എന്നിവർ മുഖ്യപ്രഭാഷണം നടത്തി. സ്ഥാനാർഥി കെ.എസ്.ശബരീനാഥൻ, മുസ്ലിംലീഗ് ജില്ലാ പ്രസിഡന്റ്‌ പ്രൊഫ.തോന്നയ്ക്കൽ ജമാൽ, മുൻ വിവരാവകാശ കമ്മീഷണർ അഡ്വ. വിതുര ശശി, യുഡിഎഫ് ജില്ലാ ചെയർമാൻ അഡ്വ. പി.കെ.വേണുഗോപാൽ, യുഡിഎഫ് ജില്ലാ കൺവീനർ ബീമാപള്ളി റഷീദ്, ആർഎസ്പി സംസ്ഥാന സമിതി അംഗം വിനോബ താഹ, കേരള കോൺഗ്രസ്‌ (ജോസഫ് ) ജില്ലാ സെക്രട്ടറി അഡ്വ. മുരളീധരൻ നായർ,കേരള കോൺഗ്രസ് ( ജേക്കബ് ) നിയോജകമണ്ഡലം പ്രസിഡന്റ്‌ കൊണ്ണിയൂർ സലീം,സിഎംപി ജില്ലാ ജോയിന്റ് സെക്രട്ടറി ജി.കരുണാകരൻ, ഫോർവേഡ് ബ്ലോക്ക്‌ ജില്ലാ അസിസ്റ്റന്റ് സെക്രട്ടറി ആർ.എസ്.ഹരി, കോൺഗ്രസ്‌ ബ്ലോക്ക്‌ പ്രസിഡന്റുമാരായ മലയടി പുഷ്‌പാംഗതൻ, സി.ആർ. ഉദയകുമാർ, ഡിസിസി ഭാരവാഹികളായ എസ്. ജലീൽ മുഹമ്മദ്‌, എൻ.ജയമോഹൻ, അഡ്വ. സി.എസ് വിദ്യാസാഗർ, വി.ആർ. പ്രതാപൻ, തോട്ടുമുക്ക് അൻസർ, സി. ജ്യോതിഷ്കുമാർ തുടങ്ങിയവർ സന്നിഹിതരായിരുന്നു.