ഓപ്പറേഷൻ സിന്ധു: ഇസ്രയേലിലും ഇറാനിലും നിന്നുള്ള 67 മലയാളികൾ കേരളത്തിലെത്തി

തിരുവനന്തപുരം ∙ ഇസ്രയേൽ–ഇറാൻ യുദ്ധ മേഖലയിലെ നിലവിലെ ആശങ്കാജനകമായ സാഹചര്യത്തിൽ, കേന്ദ്ര വിദേശകാര്യ മന്ത്രാലയത്തിന്റെ നേതൃത്വത്തിൽ നടത്തപ്പെട്ട ‘ഓപ്പറേഷൻ സിന്ധു’വിന്റെ ഭാഗമായി 67 മലയാളികളെ സുരക്ഷിതമായി കേരളത്തിലെത്തിച്ചു.

ഡൽഹിയിൽ എത്തിയവരെ കേരളത്തിലേക്ക് കൊണ്ടുവരാൻ സംസ്ഥാന സർക്കാർ ചുമതലയെടുത്തു. വിമാന ടിക്കറ്റുകൾ, ഭക്ഷണം, വാഹന സൗകര്യം എന്നിവ സർക്കാർ സംവിധാനിച്ചു. ഇറാനും ഇസ്രയേലും ഉൾപ്പെടെ യുദ്ധപ്രദേശങ്ങളിൽ നിന്നെത്തിയ മലയാളികൾക്ക് സുരക്ഷിത മടങ്ങിപ്പോകൽ സൗകര്യവുമാണ് നൽകിയത്.

ഒഴിപ്പിക്കൽ നടപടികൾ വഴി ഡൽഹിയിൽ എത്തിച്ചേർന്ന 88 പേർ കേരളക്കാരാണ്. ഇവരിൽ 21 പേർ ഇറാനിൽ നിന്നും, 67 പേർ ഇസ്രയേലിൽ നിന്നും ആയിരുന്നു. ഇറാനിൽ നിന്നെത്തിയ 17 പേരെയും ഇസ്രയേലിൽ നിന്നെത്തിയ 50 പേരെയുമടക്കം 67 പേരെ സംസ്ഥാന സർക്കാർ നേരിട്ട് കേരളത്തിലെത്തിച്ചു. ശേഷിച്ച 21 പേർ സ്വന്തമായി ഡൽഹിയിൽ നിന്ന് നാട്ടിലേക്ക് മടങ്ങി.

പ്രവർത്തനങ്ങൾക്ക് ഏകോപനം നൽകാൻ, ന്യൂഡൽഹി കേരള ഹൗസിലെ അഡിഷനൽ റസിഡന്റ് കമ്മിഷണർ ചേതൻ കുമാർ മീണ, എൻആർകെ ഡവലപ്മെന്റ് ഓഫീസർ ജെ. ഷാജിമോൻ എന്നിവരുടെ നേതൃത്വത്തിൽ പ്രത്യേക സംഘത്തെ രൂപീകരിച്ചിരുന്നു.