ഒരു കോടി ഡോസ് കോവിഡ് വാക്സിന്‍ വാങ്ങും ; സംസ്ഥാനത്ത് ലോക്ക്ഡൗണ്‍ വേണ്ടെന്നും മന്ത്രിസഭായോഗം

ഒരു കോടി ഡോസ് കോവിഡ് വാക്സിന്‍ വാങ്ങാന്‍ സംസ്ഥാന മന്ത്രിസഭായോഗത്തില്‍ തീരുമാനം. കോവിഡ് വ്യാപനം അതി രൂക്ഷമായെങ്കിലും സംസ്ഥാനത്ത് ലോക്ക്ഡൗണ്‍ ഉടനെ വേണ്ടെന്നും ധാരണയായി

തിരുവനന്തപുരം: ഒരു കോടി ഡോസ് കോവിഡ് വാക്സിന്‍ വാങ്ങാന്‍ സംസ്ഥാന മന്ത്രിസഭാ യോഗ ത്തില്‍ തീരുമാനം. കോവിഡ് വ്യാപനം അതി രൂക്ഷമായെങ്കിലും സംസ്ഥാനത്ത് ലോക്ക്ഡൗണ്‍ ഉടനെ വേണ്ടെന്ന ധാരണയിലാണ് ഇന്ന് ചേര്‍ന്ന മന്ത്രിസഭായോഗം. നിലവില്‍ ഏര്‍പ്പെടുത്തിയ കര്‍ ശന നിയന്ത്രണങ്ങള്‍ എത്രത്തോളം ഫലപ്രദമായെന്ന് വിലയിരുത്തിയ ശേഷം മാത്രം സംസ്ഥാന വ്യാപകമായി ലോക്ക്ഡൗണ്‍ എന്ന സാദ്ധ്യ ത പരിശോധിച്ചാല്‍ മതിയെന്നാണ് മന്ത്രിസഭായോ ഗത്തി ലെ ധാരണ.

രോഗവ്യാപനം അതിതീവ്രമായ സ്ഥലങ്ങളില്‍ പ്രാദേശിക ലോക്ക്ഡൗണ്‍ അടക്കം നടപ്പാക്കാന്‍ ജില്ലാ കലക്ടര്‍മാര്‍ക്ക് അനുമതി കൊടുക്കാനും സര്‍ക്കാര്‍ തലത്തില്‍ ധാരണയായിട്ടുണ്ട്. പതിനഞ്ച് ശതമാനത്തിന് മുകളില്‍ ടെസ്റ്റ് പൊസിറ്റിവിറ്റി നിരക്കുളള ജില്ലകളില്‍ ലോക്ക്ഡൗണ്‍ എന്ന കേന്ദ്ര നിര്‍ദേശം തത്ക്കാലം നടപ്പാക്കേണ്ട എന്നാണ് കേരളത്തിന്റെ നിലപാട്. അടുത്ത സര്‍ക്കാരാവും ഇനി ലോക്ക്ഡൗണ്‍ സംബന്ധിച്ച കാര്യങ്ങളില്‍ തീരുമാനമെടുക്കുക.

കൂടുതല്‍ വാക്സിനായി കേന്ദ്രത്തോട് നിരന്തരം ആവശ്യമുന്നയിച്ചെങ്കിലും കാര്യമായ പ്രതികരണം ഇല്ലാതെ വന്നതോടെയാണ് സ്വന്തം നിലയില്‍ വാക്സിന്‍ വാങ്ങാനുളള നടപടികള്‍ സംസ്ഥാനം വേഗത്തിലാക്കിയത്. മേയ് മാസത്തില്‍ തന്നെ പത്ത് ലക്ഷം ഡോസ് വാക്സിന്‍ കേരളത്തില്‍ എത്തിക്കാമെന്ന് സിറം ഇന്‍സ്റ്റിറ്റ്യൂട്ടും ഭാരത് ബയോടെക്കും സര്‍ക്കാരിന് ഉറപ്പ് നല്‍കിയെന്നാണ് സൂചന. ഇതോടൊപ്പം കേന്ദ്രസര്‍ക്കാരില്‍ നിന്നും കൂടുതല്‍ സൗജന്യവാക്സിന്‍ നേടിയെടുക്കാനുളള സമ്മര്‍ദ്ദവും സംസ്ഥാനം തുടരും.