ഒമാനിലെ ഇന്ത്യൻ സ്‌കൂളുകൾ ഈ ആഴ്ച മുതൽ വീണ്ടും തുറന്ന് പ്രവർത്തനം ആരംഭിക്കുന്നു

മസ്‌കത്ത്: വേനലവധിക്ക് ശേഷം ഒമാനിലെ ഇന്ത്യൻ സ്‌കൂളുകൾ പുനരാരംഭിക്കുന്നു. അവധിക്കാലത്ത് നാട്ടിലായിരുന്ന മലയാളികളടക്കമുള്ള നിരവധി പ്രവാസി കുടുംബങ്ങൾ ഇപ്പോൾ ഒമാനിലേക്ക് തിരിച്ചെത്തിയിരിക്കുകയാണ്.

ഇന്ത്യൻ സ്‌കൂൾ ഗൂബ്ര കഴിഞ്ഞ ദിവസം തന്നെ പ്രവർത്തനം ആരംഭിച്ചപ്പോള്‍, മസ്‌കത്ത് ഇന്ത്യൻ സ്‌കൂൾ തിങ്കളാഴ്ചയും, ഇന്ത്യൻ സ്‌കൂൾ ദാസായിത്ത് ചൊവ്വാഴ്ചയും തുറക്കുമെന്ന് അറിയിക്കുന്നു. മറ്റു ഇന്ത്യൻ സ്‌കൂളുകളും അടുത്ത ആഴ്ചയോടെ മുഴുവൻ പ്രവർത്തനക്ഷമമാകുമെന്ന് സ്‌കൂൾ ഭരണസമിതികൾ അറിയിച്ചു.

നിലവിൽ ഒമാനിൽ കനത്ത ചൂടാണ് അനുഭവപ്പെടുന്നത്. പല പ്രദേശങ്ങളിലും താപനില 40 ഡിഗ്രി സെൽഷ്യസിന് മുകളിലാണ്. ഇതിന്റെ പശ്ചാത്തലത്തിൽ, വേനലവധിക്ക് മുമ്പ് പല സ്‌കൂളുകളും പ്രവർത്തന സമയങ്ങളിൽ മാറ്റങ്ങൾ കൊണ്ടുവന്നിരുന്നു.

സ്‌കൂൾ തുറക്കുന്നതോടെ ഇന്ത്യൻ സ്‌കൂളുകളിൽ സ്വാതന്ത്ര്യ ദിനാഘോഷങ്ങളിലേക്കുള്ള ഒരുക്കങ്ങൾ സജീവമാകുന്നുണ്ട്. സാംസ്‌കാരിക കലാപരിപാടികളുടെ പരിശീലനങ്ങളും അടുത്ത ദിവസങ്ങളിൽ ആരംഭിക്കുമെന്നാണ് വിവരം.

സ്‌കൂൾ തുറക്കലിനൊപ്പം ഒമാനിലെ വ്യാപാര മേഖലയിലും സജീവത കാണപ്പെടുന്നു. പ്രധാന ഷോപ്പിംഗ് മാളുകളിലും വ്യാപാര സ്ഥാപനങ്ങളിലും ‘ബാക്ക് ടു സ്‌കൂൾ’ ഓഫറുകൾ ആരംഭിച്ചിട്ടുള്ളത്, വിദ്യാർത്ഥികൾക്കും രക്ഷിതാക്കൾക്കും ഏറെ ആകർഷകമാണ്. ചെറുതും വലുതുമായ സ്ഥാപനങ്ങളിലെല്ലാം പഠനോപകരണങ്ങളുടെ വിൽപ്പനയിൽ തിരക്കാണ്.