ഇന്ത്യൻ എംബസി: അപെക്സ് ബോഡി തിരഞ്ഞെടുപ്പ് ജനുവരി 31ന്.

ദോഹ : ഖത്തറിലെ ഇന്ത്യൻ എംബസിയുടെ കീഴിൽ പ്രവർത്തിക്കുന്ന മൂന്ന് സംഘടനകളുടെ തിരഞ്ഞെടുപ്പ് തീയതി പ്രഖ്യാപിച്ചു. ഇന്ത്യൻ കൾച്ചറൽ സെന്‍റർ, ഇന്ത്യൻ കമ്മ്യൂണിറ്റി ബെനവലന്‍റ് ഫോറം, ഇന്ത്യൻ സ്പോർട്സ് സെന്‍റർ എന്നിവയുടെ പ്രസിഡന്‍റ്, മാനേജിങ് കമ്മിറ്റി അംഗങ്ങൾ എന്നീ സ്ഥാനങ്ങളിലേക്കാണ് തിരഞ്ഞെടുപ്പ്.
ജനുവരി 31ന് രാവിലെ ഒൻപത് മുതൽ വൈകുന്നേരം 6 മണി വരെയാണ് വോട്ടെടുപ്പ്. ഓൺലൈനായി നടക്കുന്ന തിരഞ്ഞെടുപ്പിന്‍റെ ഫലം അന്നുതന്നെ പ്രഖ്യാപിക്കും.  ജനുവരി 17 വൈകുന്നേരം 5 മണി വരെ നാമനിർദ്ദേശപത്രിക സമർപ്പിക്കാം. ജനുവരി 18ന് വൈകുന്നേരം 5 മണിക്ക് മത്സരിക്കാൻ യോഗ്യതയുള്ള സ്ഥാനാർഥികളുടെ പേര് എംബസി പ്രസിദ്ധീകരിക്കും. . ജനുവരി 23ന് വൈകുന്നേരം 5 മണി വരെ  പത്രിക പിൻവലിക്കാം. പിറ്റേന്ന് വൈകുന്നേരം 5ന് അന്തിമ സ്ഥാനാർഥി പട്ടിക പ്രസിദ്ധീകരിക്കും.
2023  നിലവിൽ വന്ന മൂന്ന് സമിതികളും രണ്ടു വർഷം പൂർത്തിയാക്കിയതിനെ തുടർന്നാണ്‌ ഇപ്പോൾ തിരഞ്ഞെടുപ്പ് നടത്തുന്നത്.