ഇന്ത്യന്‍ ഗോതമ്പ് യുഎഇയില്‍ നിന്നും കയറ്റി അയയ്ക്കുന്നതിന് വിലക്ക്

ഗോതമ്പ് ക്ഷാമം മുന്‍ നിര്‍ത്തിയാണ് യുഎഇ സര്‍ക്കാരിന്റെ നടപടി

ദുബായ്  : ഇന്ത്യയില്‍ നിന്നും ഇറക്കു മതി ചെയ്ത ഗോതമ്പ് യുഎഇയില്‍ നിന്നും മറ്റു രാജ്യങ്ങളിലേക്ക് കയറ്റു മതി ചെയ്യുന്നതിന് വിലക്ക് ഏര്‍പ്പെടുത്തി.

ഗോതമ്പു ക്ഷാമം മുന്‍ നിര്‍ത്തിയാണ് നാലു മാസത്തേക്ക് വിലക്ക് ഏര്‍പ്പെടുത്തിയത്.

ഗോതമ്പും ഗോതമ്പു പൊടിയും ഇത്തരത്തില്‍ കയറ്റി അയയ്ക്കുന്നതിനാണ് വിലക്ക്.

യുഎഇ ഫ്രീസോണുകളിലെ തുറുമുഖങ്ങളില്‍ നിന്നും ഇതര രാജ്യങ്ങളിലേക്കുള്ള കയറ്റുമതിക്ക് ജൂണ്‍ 13 മുതല്‍ നാലു മാസത്തേക്കാണ് വിലക്ക്.

ഇന്ത്യയില്‍ നിന്നും ഗോതമ്പ് ഇറക്കുമതി ചെയ്ത കമ്പനികള്‍ പുനര്‍ കയറ്റുമതി ചെയ്യാന്‍ ആഗ്രഹിക്കുന്നുവെങ്കില്‍ ഇതിനുള്ള അനുമതിക്കായി സാമ്പത്തിക മന്ത്രാലയത്തിന് അപേക്ഷ നല്‍കണം.

യുക്രയിനില്‍ നിന്നും മറ്റും ഇറക്കുമതി ചെയ്യുന്ന ഗോതമ്പിന് ക്ഷാമം നേരിട്ടതോടെയാണ് ഗള്‍ഫ് മേഖലയില്‍ പ്രതിസന്ധിയുണ്ടായത്. ഇതിനെ തുടര്‍ന്നാണ് ഇന്ത്യയില്‍ നിന്നുള്ള ഗോതമ്പ് ഇതര രാജ്യങ്ങളിലേക്ക് പുനര്‍ കയറ്റുമതി ചെയ്യുന്നതിന് താല്‍ക്കാലിക വിലക്കേര്‍പ്പെടുത്തിയത്.