ആകാശത്ത് വർണ്ണ വിസ്മയം തീർത്ത് ലുസെയ്ൽ സ്കൈ ഫെസ്റ്റിവലിന്  തുടക്കമായി

ദോഹ : ആകാശത്ത് വർണ്ണ വിസ്മയം തീർത്ത് ലുസെയ്ൽ സ്കൈ ഫെസ്റ്റിവലിന്  തുടക്കമായി. ലുസെയ്ൽ ബൗളെവാർഡിലെ അൽസദ് പ്ലാസയിൽ ആണ് മൂന്നുദിവസം നീണ്ടുനിൽക്കുന്ന സ്കൈ ഫെസ്റ്റിവലിന് ഇന്നലെ  തുടക്കമിട്ടത്.ഈദ്  അവധിയാഘോഷത്തിന്റെ ഭാഗമായി നടക്കുന്ന  ആകാശക്കാഴ്ച കാണാൻ കുട്ടികളും കുടുംബങ്ങളും ഉൾപ്പെടെ ആയിരകണക്കിനാളുകളാണ് എത്തിയത്. ഖത്തരി ദിയാറുമായി സഹകരിച്ച് വിസിറ്റ് ഖത്തർ ആണ് സ്കൈ ഫെസ്റ്റിവലിന് ചുക്കാൻ പിടിക്കുന്നത്. മേഖലയിൽ തന്നെ  ഇത്തരമൊരു വലിയ പരിപാടി ഇതാദ്യമാണ്. രാജ്യാന്തര എയറോബാറ്റിക്സ്, സ്കൈ ഡൈവിങ്, സ്കൈറൈറ്റിങ് പ്രകടനങ്ങൾ, ഹൈ-സ്പീഡ് ജെറ്റ് ഡിസ്പ്ലേകൾ എന്നിവയുൾപ്പെടെയുള്ള ആകാശ പ്രകടനങ്ങളാണ് ലുസെയ്ൽ സ്കൈ ഫെസ്റ്റിവലിന്റെ ഭാഗമായി നടക്കുന്നത്.
ലേസർ ഡിസ്പ്ലേകൾ, ആകാശ പൈറോടെക്നിക്കുകൾ എന്നിവ ഉപയോഗിച്ച് സൃഷ്ടിക്കുന്ന വിമാനങ്ങളുടെ രൂപങ്ങൾ, ഡ്രോൺ ഷോകളും പ്രേക്ഷകർക്ക് വിസ്മയക്കാഴ്ചയായി. ആകാശ കാഴ്ചകൾക്കപ്പുറം വിവിധ രുചികളിലുള്ള വിപുലമായ ഫുഡ് പ്രദർശനവും നിരവധിപേരെ ആകർഷിച്ചു. പരമ്പരാഗത ഖത്തർ വിഭവങ്ങളും വിവിധ രാജ്യങ്ങളുടെ ഭക്ഷണവൈവിധ്യവും അറിയാനും ആസ്വദിക്കാനുമുള്ള അവസരമായി ഫുഡ് ഫെസ്റ്റിവൽ മാറി.

കുട്ടികൾക്കും കുടുംബങ്ങൾക്കുമായി വിവിധ മത്സരങ്ങൾ, കാലപ്രദർശനങ്ങൾ, വിനോദ പരിപാടികൾ തുടങ്ങിയവയും നടക്കുന്നുണ്ട്. ഏപ്രിൽ 5 വരെ നീണ്ടു നിൽക്കുന്ന ലുസെയ്ൽ സ്കൈ ഫെസ്റ്റിവൽ വൈകിട്ട് 4.30 മുതൽ രാത്രി 10 മണി വരെയാണ് നടക്കുക. വിപുലമായ സുരക്ഷാ സംവിധാനങ്ങളും യാത്ര സൗകര്യങ്ങളും അധികൃതർ ഒരുക്കിയിട്ടുണ്ട്. ലുസെയ്ൽ ബൗളെവാർഡിലേക്ക് മെട്രോയിൽ നേരിട്ട് എത്താം.