ലോകത്ത് കോവിഡ് ബാധിതരുടെ എണ്ണം രണ്ട് കോടി കടന്നു

വാഷിങ്ടണ്‍: ലോകത്ത് രണ്ട് കോടിയിലധികം കോവിഡ് ബാധിതരായി. 2,02,46,580 പേര്‍ക്കാണ് ഇതുവരെ രോഗബാധ സ്ഥിരീകരിച്ചിരിക്കുന്നത്. 64,00,525 പേര്‍ നിലവില്‍ ചികിത്സയിലാണ്. 7,38,695 പേര്‍ക്കാണ് ജീവന്‍ നഷ്ടമായത്.

ഏറ്റവും കൂടുതല്‍ കോവിഡ് രോഗികള്‍ റിപ്പോര്‍ട്ട് ചെയ്തിരിക്കുന്നത് അമേരിക്ക, ബ്രസീല്‍, ഇന്ത്യ എന്നീ രാജ്യങ്ങളിലാണ്. അമേരിക്കയില്‍ 52,51,446 പേര്‍ക്കാണ് കോവിഡ് സ്ഥിരീകരിച്ചത്. 1,66,192 മരണം റിപ്പോര്‍ട്ട് ചെയ്തു. കാലിഫോര്‍ണിയ, ഫ്‌ളോറിഡ, ടെക്‌സസ്, ന്യൂയോര്‍ക്ക്, ജോര്‍ജിയ എന്നീ അഞ്ച് സംസ്ഥാനങ്ങളിലാണ് ഏറ്റവും കൂടുതല്‍ കോവിഡ് റിപ്പോര്‍ട്ട് ചെയ്തിരിക്കുന്നത്.

ബ്രസീലില്‍ 30,57,470 പേര്‍ക്കാണ് രോഗം സ്ഥിരീകരിച്ചത്. ഇതുവരെ 1,01,857 മരണം റിപ്പോര്‍ട്ട് ചെയ്തു.

അതേസമയം ഇന്ത്യയില്‍ കഴിഞ്ഞ 24 മണിക്കൂറില്‍ രാജ്യത്ത് കോവിഡ് സ്ഥിരീകരിച്ചത് 53,601 പേര്‍ക്കാണ്. ഇന്നലെ മാത്രം 871 ആളുകള്‍ മരിച്ചു. വിവിധ സംസ്ഥാനങ്ങളിലായി ഇതുവരെ 22.68 ലക്ഷം ആളുകളാണ് രോഗബാധിതരായത്. 15.83 ലക്ഷം പേര്‍ രോഗമുക്തി നേടി. ഇതുവരെ 45,257 പേര്‍ മരിച്ചു. നിലവില്‍ 6.39 ലക്ഷം പേരാണ് ചികിത്സയിലുളളതെന്നും കേന്ദ്ര ആരോഗ്യ മന്ത്രാലയം അറിയിച്ചു. രാജ്യത്ത് മഹാരാഷ്ട്ര, തമിഴ്‌നാട്, ആന്ധ്രപ്രദേശ്, കര്‍ണാടക എന്നിവിടങ്ങളിലാണ് കോവിഡ് ബാധിതര്‍ കൂടുതലുളളത്. രാജ്യത്ത് 28.21% ആണ് നിലവില്‍ ചികിത്സയില്‍ കഴിയുന്നവരുടെ എണ്ണം. 69.80% പേര്‍ രോഗമുക്തി നേടി.

റഷ്യ (8,92,654), ദക്ഷിണാഫ്രിക്ക (5,63,598), മെക്‌സിക്കോ (4,85,836), പെറു (4,78,024), കൊളംബിയ (3,97,623), ചിലി (3,75,044), സ്‌പെയിന്‍ (3,70,060) എന്നീ രാജ്യങ്ങളാണ് കോവിഡ് ബാധിതരുടെ പട്ടികയില്‍ ആദ്യ പത്തില്‍ ഇടംനേടിയിരിക്കുന്നത്.