എഡിറ്റോറിയല്‍
ജോസ്‌ കെ. മാണിയുടെ നേതൃത്വത്തിലുള്ള കേരള കോണ്ഗ്രസ് മാണി വിഭാഗത്തെ യുഡിഎഫില്‍ നിന്ന്‌ പുറത്താക്കാനുള്ള തീരുമാനം കേരള രാഷ്‌ട്രീയത്തിലെ ഈക്കിലി പാര്‍ട്ടികളുടെ സാന്നിധ്യത്തെ കുറിച്ചുള്ള ചര്‍ച്ചയ്‌ക്കാണ്‌ വഴിവെച്ചിരിക്കുന്നത്‌. ഇത്തരം പാര്‍ട്ടികള്‍ക്ക്‌ മുന്നണികളില്‍ ലഭിക്കുന്ന അമിത പ്രാധാന്യവും അനര്‍ഹമായ പ്രാതിനിധ്യവും അവയ്‌ക്കില്ലാത്ത വിലപേശല്‍ മൂല്യമാണ്‌ നല്‍കുന്നത്‌.
ഇത്‌ ഏതെങ്കിലും ഒരു മുന്നണിയില്‍ മാത്രം കാണുന്ന കാര്യമല്ല. എല്‍ഡിഎഫിലും ഇതേ അവസ്ഥയുണ്ട്‌. ബാലകൃഷ്‌ണ പിള്ളയെ മുന്നോക്ക വിഭാഗ വികസന കോര്‍പ്പറേഷന്റെ ചെയര്‍മാനായി നിലനിര്‍ത്തിയിരിക്കുന്നത്‌ ഉദാഹരണം. ഒരു മണ്‌ഡലത്തില്‍ മാത്രം നിര്‍ണായക ശക്തിയെന്ന്‌ പറയാവുന്ന പാര്‍ട്ടികള്‍ക്ക്‌ പോലും മുന്നണികളില്‍ അമിത പ്രാതിനിധ്യമാണ്‌ ലഭിക്കുന്നത്‌.
ഈ പാര്‍ട്ടികള്‍ പ്രകടിപ്പിക്കുന്ന വിട്ടുവീഴ്‌ചയില്ലായ്‌മയും വാശിയും അവയുടെ രാഷ്‌ട്രീയ ബാലിശത്വത്തെ എടുത്തു കാട്ടുന്നതാണ്‌. കോട്ടയം ജില്ലാ പഞ്ചായത്തിന്റെ അധികാര കൈമാറ്റം എന്ന ഒത്തുതീര്‍പ്പ്‌ നിര്‍ദേശം പാലിക്കാത്തതിനെ തുടര്‍ന്നാണ്‌ കേരള കോണ്ഗ്രസ് മാണി വിഭാഗത്തെ യുഡിഎഫില്‍ നിന്ന്‌ പുറത്താക്കിയത്‌. പ്രതിപക്ഷ നേതാവ്‌ രമേശ്‌ ചെന്നിത്തല പറയുന്നത്‌ മുന്നണിയില്‍ നിന്ന്‌ പുറത്താക്കിയെന്ന്‌ പറയുന്നത്‌ ശരിയല്ലെന്നും മുന്നണിയില്‍ നിന്ന്‌ മാറ്റിനിര്‍ത്തുക മാത്രമാണ്‌ ചെയ്‌തതെന്നും കോട്ടയം ജില്ലാ പഞ്ചായത്തിന്റെ അധികാരം കൈമാറ്റം നടപ്പിലാക്കിയാല്‍ അവര്‍ക്ക്‌ മുന്നണിയിലേക്ക്‌ തിരിച്ചെത്താമെന്നുമാണ്‌. എന്നിട്ടും ആ പാര്‍ട്ടി കാണിക്കുന്ന വാശിയും ബലംപിടുത്തവും അവര്‍ക്കില്ലാത്ത വിലപേശല്‍ മൂല്യം ഉണ്ടെന്ന്‌ ഭാവിച്ചാണ്‌.
കെ.എം.മാണി അന്തരിക്കുന്നതിന്‌ മുമ്പ്‌ അദ്ദേഹം സ്ഥിരമായി ജയിച്ചുപോന്ന പാലനിയമസഭാ മണ്‌ഡലത്തില്‍ നടന്ന ഉപതിരഞ്ഞെടുപ്പില്‍ യുഡിഎഫിന്‌ ഉണ്ടായ തോല്‍വി കേരള കോണ്ഗ്രസ് എന്ന പാര്‍ട്ടിക്ക്‌ സ്വാധീനമുണ്ടെന്ന്‌ കരുതപ്പെട്ടിരുന്ന സ്ഥലങ്ങളില്‍ പോലും അത്‌ ഇല്ലാതാവുകയാണെന്നാണ്‌ വ്യക്തമാക്കുന്നത്‌. ആ പാര്‍ട്ടിയുടെ അന്തസ്സില്ലായ്‌മയ്‌ക്കും രാഷ്‌ട്രീയമായ അപക്വതക്കും ജനങ്ങള്‍ കൊടുത്ത മറുപടിയായിരുന്നു പാലയിലെ തിരഞ്ഞെടുപ്പ്‌ ഫലം. എന്നിട്ടും അതില്‍ നിന്നൊന്നും യാതൊരു പാഠവും പഠിച്ചിട്ടില്ലെന്ന്‌ തെളിയിക്കുകയാണ്‌ ആ പാര്‍ട്ടിയുടെ ബാലിശമായ നിലപാടുകള്‍.
മുന്നണി രാഷ്‌ട്രീയത്തിന്റെ ആനുകൂല്യത്തിലാണ്‌ പല ഈര്‍ക്കില്‍ പാര്‍ട്ടികളും അവരുടെ നേതാക്കളും പിഴച്ചുപോകുന്നത്‌. വിവിധ കോര്‍പ്പറേഷനുകളും മറ്റും ഭരിക്കുന്നവരുടെ പട്ടികയെടുത്താല്‍ ഇക്കാര്യം ബോധ്യമാകും.
ഇപ്പോഴത്തെ പിണക്കം വരാനിരിക്കുന്ന നിയമസഭാ തിരഞ്ഞെടുപ്പ്‌ മുന്നില്‍ കണ്ടുള്ളതാണ്‌. തങ്ങള്‍ക്ക്‌ കഴിഞ്ഞ പ്രാവശ്യം മത്സരിച്ച അത്രയും സീറ്റുകള്‍ വേണമെന്ന്‌ കേരള കോണ്ഗ്രസ് മാണി വിഭാഗം മുന്നണിയില്‍ ആവശ്യപ്പെട്ടിരുന്നു. ഈ ആവശ്യത്തെ പിന്തുണക്കാമെന്ന്‌ മുസ്ലിം ലീഗ്‌ ആദ്യം പറഞ്ഞിരുന്നെങ്കിലും പിന്നീട്‌ പിന്‍മാറി.
കേരള കോണ്ഗ്രസ് മാണി വിഭാഗം പുറത്തായാല്‍ രാജ്യസഭാ സീറ്റ്‌ തങ്ങള്‍ക്കെടുക്കാമെന്ന ആഗ്രഹമാണ്‌ കോണ്‍ഗ്രസിനുള്ളത്‌. ജോസഫ് വിഭാഗത്തിന്‌ മാണി ഗ്രൂപ്പ്‌ പുറത്തായാല്‍ കേരള കോണ്ഗ്രസ് കഴിഞ്ഞ പ്രാവശ്യം മത്സരിച്ച അത്രയും സീറ്റുകള്‍ ആവശ്യപ്പെടാനും കഴിയും. സോണിയാഗാന്ധി കൂടി കൈവിട്ട സാഹചര്യത്തിലാണ്‌ മാണി ഗ്രൂപ്പ്‌ കോട്ടയം ജില്ലാ പഞ്ചായത്ത്‌ വിട്ടുകൊടുക്കാതിരുന്നത്‌.
മസ്‌കറ്റ്: We Help Blood Donor’s Oman ന്റെ നേതൃത്വത്തിൽ, ബ്ലഡ് ഡോണേഴ്സ് കേരളയുടെ സ്ഥാപകനും പ്രസിഡന്റുമായിരുന്ന വിനോദ് ഭാസ്കറിന്റെ…
മസ്‌ക്കറ്റ്: ഒമാനിലെ റൂവി മലയാളി അസോസിയേഷന്റെ ഭാഗമായി പ്രവർത്തിക്കുന്ന വനിതാ വിങിന്റെ നേതൃത്വത്തിൽ അനന്തപുരി ഹോട്ടലിൽ പ്രത്യേക യോഗം നടത്തി.…
മസ്‌ക്കത്ത്: ഇന്ത്യയുടെ 78-ാമത് സ്വാതന്ത്ര്യ ദിനത്തോടനുബന്ധിച്ച് റൂവി മലയാളി അസോസിയേഷനും ദാർസൈറ്റ് ലൈഫ് ലൈൻ ഹോസ്പിറ്റലും സംയുക്തമായി ആരോഗ്യ അവബോധ…
തൃപ്പൂണിത്തുറ: പാറക്കടത്തു കോയിക്കൽ ട്രസ്റ്റ് നടത്തുന്ന 12ാമത് "തൃപ്പൂണിത്തുറ ആസ്ഥാന വിദ്വാൻ പുരസ്‌കാരങ്ങൾ" പ്രഖ്യാപിച്ചു. വായ്‌പ്പാട്ട് വിഭാഗത്തിൽ പ്രൊഫ. തുളസി…
ദുബൈ ∙ ദ്രവീകൃത പ്രകൃതി വാതകം (എൽ.എൻ.ജി) ഇന്ത്യയിലേക്ക് എത്തിക്കുന്നതിനായി യു.എ.ഇയിലെ അബൂദബിയിലെ ഓയിൽ കമ്പനിയായ അഡ്നോക് ഗ്യാസ്യും ഇന്ത്യയിലെ…
മനാമ : ശൂര കൗൺസിൽ ചെയർമാൻ അലി ബിൻ സാലിഹ് അൽ സാലിഹ്, സ്ഥാനം ഒഴിയുന്ന അമേരിക്കൻ അംബാസഡർ സ്റ്റീവൻ…
This website uses cookies.