സൗരോര്‍ജ പാര്‍ക്ക് മൂന്നാം ഘട്ടം: ഷെയ്ഖ് മുഹമ്മദ് ഉദ്ഘാടനം ചെയ്തു

ദുബായ്: ലോകത്തെ ഏറ്റവും വലിയ സൗരോര്‍ജ പദ്ധതിയുടെ മൂന്നാം ഘട്ട പ്രവര്‍ത്തനം യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം ദുബായില്‍ ഉദ്ഘാടനം ചെയ്തു. ദുബൈ ഇലക്ട്രിസിറ്റി ആന്‍ഡ് വാട്ടര്‍ അതോറിറ്റിയുടെ ഇന്നവേഷന്‍ സെന്ററും ഇതോടൊപ്പം തുറന്നു.

50 ശതകോടി ദിര്‍ഹം ചെലവാണ് സോളാര്‍ പാര്‍ക്കിന് പ്രതീക്ഷിക്കുന്നത്. ദുബൈ ഇലക്ട്രിസിറ്റി ആന്‍ഡ് വാട്ടര്‍ അതോറിറ്റിയുടെ പുതിയ പരീക്ഷണങ്ങള്‍ക്കും ഗവേഷണങ്ങള്‍ക്കും വേദിയൊരുക്കുന്നതാണ് ഇന്നവേഷന്‍ സെന്റര്‍. മൂന്നാം ഘട്ടത്തില്‍ 800 മെഗാവാട്ട് സൗരോര്‍ജം കൂടി ഉല്‍പാദിപ്പിക്കാനുള്ള ശേഷി കൈവരിക്കും. നാലാംഘട്ട നിര്‍മാണവും സോളാര്‍ പാര്‍ക്കില്‍ പുരോഗമിക്കുകയാണ്. 950 മെഗാവാട്ടാണ് നാലാംഘട്ടത്തിന്റെ ശേഷി. ഇത്തരത്തിലുള്ള ലോകത്തിലെ ഏറ്റവും വലിയ പദ്ധതിയാണ് നാലാംഘട്ടം. ലോകത്തിലെ ഏറ്റവും വലിയ സോളാല്‍ പവര്‍ ടവറും ഈ പദ്ധതിയുടെ ഭാഗമാണ്. 264 മീറ്ററാണ് ഉയരം. 2030 ഓടെ 5000 മെഗാവാട്ട് സൗരോര്‍ജമാണ് മുഹമ്മദ് ബിന്‍ റാശിദ് സോളാര്‍ പാര്‍ക്കില്‍നിന്ന് ലക്ഷ്യമിടുന്നത്.

നാലാംഘട്ട നിര്‍മാണം നടന്നുകൊണ്ടിരിക്കുന്ന മുഹമ്മദ് ബിന്‍ റാഷിദ് സൗരോര്‍ജ പാര്‍ക് സന്ദര്‍ശനത്തിന്റെ ചിത്രങ്ങള്‍ ഷെയ്ഖ് മുഹമ്മദ് ട്വീറ്റ് ചെയ്തു. വരുന്ന 30 വര്‍ഷത്തിനുള്ളില്‍ 75% ശുദ്ധമായ വൈദ്യുതിയാണ് തങ്ങളുടെ ലക്ഷ്യമെന്ന് അദ്ദേഹം പറഞ്ഞു. നിര്‍മ്മാണം പൂര്‍ത്തിയായിക്കഴിയുമ്പോള്‍ ലോകത്തെ ഏറ്റവും വലിയ സിംഗിള്‍ സൈറ്റ് സോളാര്‍ എനര്‍ജി പദ്ധതിയായി ഇത് മാറും. ഇതുവഴി 270,000 വീടുകള്‍ക്ക് 5,000 മെഗാ വാട് ശുദ്ധ വൈദ്യുതി ലഭിക്കും.