തീവ്രവാദത്തിനെതിരെ ഒരുമിച്ച്‌​ പോരാടാന്‍ തയ്യാറായി യു.എ.ഇ-ഇസ്രായേല്‍ കരാര്‍

യു.എ.ഇയും ​​ഇസ്രായേലും തമ്മില്‍ ഒപ്പുവെച്ച സമാധാന കരാറിന്റെ ഉള്ളടക്കം പുറത്ത് വന്നു. ‘അബ്രഹാം ഉടമ്പടി’ എന്നു​ പേരിട്ട കരാറില്‍ പശ്ചിമേഷ്യയുടെ സുരക്ഷക്കാണ്​ പ്രാധാന്യമെന്നു​ പറയുന്നു. തീവ്രവാദത്തിനെതിരെ പോരാടുന്നതിനായി പശ്ചിമേഷ്യക്കായി പ്രത്യേക നയം രൂപവത്​കരിക്കും. ഇക്കാര്യത്തില്‍ യു.എസുമായി ചേര്‍ന്ന്​ പ്രവര്‍ത്തിക്കും. തീവ്രവാദത്തിനും പൊതുശത്രുക്കള്‍​ക്കുമെതിരെ പ്രതിരോധിക്കുന്നതിന്​ സഹകരിക്കും.

ഇരു രാജ്യങ്ങളിലും എംബസികള്‍ സ്​ഥാപിക്കും. ആരോഗ്യം, വ്യോമയാനം, പരിസ്​ഥിതി, ഊര്‍ജം തുടങ്ങിയ മേഖലകളിലെ സഹകരണം ഊന്നിപ്പറയുന്നു. ഇരു രാജ്യങ്ങളിലെയും വ്യക്​തികള്‍ക്കും സ്​ഥാപനങ്ങള്‍ക്കും പരസ്​പരം സഹകരിക്കുന്നതിന്​ തടസ്സമുണ്ടാകില്ല. രാജ്യങ്ങളുടെ പരമാധികാര വിഷയത്തില്‍ പരസ്​പരം ഇടപെടരുത്​. സാമ്ബത്തികം, വിസ, കോണ്‍സുലാര്‍ സര്‍വിസ്​, ശാസ്​ത്രം, സാ​ങ്കേതികവിദ്യ, വിനോദസഞ്ചാരം, കായികം, സംസ്​കാരം, വിദ്യാഭ്യാസം, നാവികം, വാര്‍ത്താവിനിമയം, കൃഷി, ഭക്ഷ്യസുരക്ഷ, ജലസേചനം, നിയമം എന്നീ മേഖലകളില്‍ സഹകരിക്കും.

ഇരുരാജ്യങ്ങള്‍ക്കുമിടയില്‍ യാത്രാവിമാനങ്ങളും കാര്‍ഗോ വിമാനങ്ങളും സര്‍വിസ്​ നടത്തും. കോവിഡ്​ വാക്​സിന്‍ വികസിപ്പിച്ചെടുക്കാന്‍ ഒരുമിച്ച്‌​ പ്രവര്‍ത്തിക്കും. സമുദ്രം വഴിയുള്ള സഞ്ചാരങ്ങള്‍ക്ക്​ തടസ്സമുണ്ടാവില്ലെന്നും കരാറില്‍ പറയുന്നു.യു.എ.ഇ​ വിദേശകാര്യമന്ത്രി ശൈഖ് ​അബ്​ദുല്ല ബിന്‍ സായിദ്​ ആല്‍ നഹ്​യാന്‍, ഇ​സ്രായേല്‍ പ്രധാനമന്ത്രി ബിന്യമിന്‍ നെതന്യാഹു എന്നിവര്‍ ഒപ്പുവെച്ചിരിക്കുന്ന കരാറില്‍ സാക്ഷിയായി ഒപ്പിട്ടിരിക്കുന്നത്​ യു.എസ്​ പ്രസിഡന്റ് ഡോണള്‍ഡ്​ ട്രംപാണ്​.