Web Desk
ന്യൂഡല്ഹി: പ്രവാസികളെ മടക്കികൊണ്ടുവരുന്നതിന് മുന്നോടിയായി ട്രൂനാറ്റ് റാപ്പിഡ് ടെസ്റ്റ് സംവിധാനം ഏര്പ്പെടുത്തണമെന്ന കേരളത്തിന്റെ ആവശ്യം കേന്ദ്രസര്ക്കാര് തള്ളി. കേന്ദ്ര വിദേശകാര്യ മന്ത്രാലയം ഇതു സംബന്ധിച്ച് എംബസികളുമായി നടത്തിയ ആശയവിനിമയത്തിന്റെ അടിസ്ഥാനത്തിലാണ് തീരുമാനം. ട്രൂനാറ്റ് പരിശോധന അപ്രായോഗികമാണെന്നും അത് അംഗീകരിക്കപ്പെട്ടിട്ടില്ലെന്നും ഗള്ഫ് രാജ്യങ്ങള് വ്യക്തമാക്കുകയായിരുന്നു.
നിലവില് റാപ്പിഡ് ആന്റിബോഡി ടെസ്റ്റ് നടത്തുന്നുണ്ടെന്നും എന്നാല് ട്രൂനാറ്റ് പരിശോധനയില്ലെന്നും യുഎഇ അറിയിച്ചതായി വിദേശകാര്യ മന്ത്രാലയം കേരള ചീഫ് സെക്രട്ടിക്കയച്ച കത്തില് പറയുന്നു. കോവിഡ് ബാധിതനായ ഒരാളെ വിമാനത്തില് കയറാന് അനുവദിക്കില്ലെന്ന നിയമം ഉള്ളതിനാല് രോഗം സ്ഥിരീകരിച്ച പ്രവാസികള്ക്കായി പ്രത്യേക വിമാനം അനുവദിക്കാനാവില്ലെന്നും യുഎഇ വ്യക്തമാക്കി. ഓരോ രാജ്യങ്ങള്ക്കും ഇക്കാര്യത്തിലുള്ള നിലപാട് മന്ത്രാലയം കേരളത്തിനയച്ച കത്തില് വിശദമാക്കിയിട്ടുണ്ട്.
വിദേശങ്ങളില്നിന്ന് മടങ്ങിയെത്തുന്ന പ്രവാസികള്ക്ക് കോവിഡ് നെഗറ്റീവ് സര്ട്ടിഫിക്കറ്റ് നിര്ബന്ധമാക്കാന് കേരളം തീരുമാനിച്ചിരുന്നു. ട്രൂനാറ്റ് റാപ്പിഡ് ടെസ്റ്റ് സംവിധാനം ഉപയോഗിച്ച് പരിശോധന നടത്തിയ ശേഷം മാത്രമേ യാത്രക്കാരെ വിമാനത്തില് കൊണ്ടുവരാവൂ എന്ന് കേരളം കേന്ദ്രത്തോട് ആവശ്യപ്പെട്ടിരുന്നു. രോഗബാധിതരെയും അല്ലാത്തവരെയും ഇടകലര്ത്തി ഒരേ വിമാനത്തില് കൊണ്ടുവരുന്നത് രോഗവ്യാപനം വര്ധിക്കാന് ഇടയാക്കുമെന്ന് ചൂണ്ടിക്കാട്ടിയാണ് കേരള സര്ക്കാര് ഇത്തരമൊരു നിര്ദേശം മുന്നോട്ടുവെച്ചത്.
