കുവൈറ്റ്‌ അമീറി​ന്റെ ആരോഗ്യത്തിനായി മറോനൈറ്റ്​ ചർച്ചിൽ പ്രത്യേക പ്രാർഥന

കുവൈത്ത്​ അമീർ ശൈഖ്​ സബാഹ്​ അൽ അഹ്​മദ്​ അൽ ജാബിർ അസ്സബാഹി​ന്റെ ആരോഗ്യത്തിന്​ കുവൈത്തിലെ മറോനൈറ്റ്​ ചർച്ചിൽ പ്രത്യേക പ്രാർഥന സംഘടിപ്പിച്ചു . വൈദികൻ റെയ്​മണ്ട്​ ഈദ്​ പ്രാർഥനക്ക്​ നേതൃത്വം നൽകി.

അമേരിക്കയിൽ ചികിത്സയിലുള്ള കുവൈത്ത്​ രാഷ്​ട്ര നായകൻ പൂർണ ആരോഗ്യവാനായി തിരിച്ചുവരണമെന്നായിരുന്നു വിശ്വാസികളുടെ പ്രാർത്ഥന . കോവിഡ്​ പശ്ചാത്തലത്തിൽ ആരോഗ്യ മാർഗനിർദേശങ്ങൾ പാലിച്ചും സാമൂഹിക അകലം ഉറപ്പുവരുത്തിയുമാണ്​ ചടങ്ങ്​ സംഘടിപ്പിച്ചത്​. അമീറി​​ന്റെ നേതൃത്വത്തിൽ കുവൈത്ത്​ ഭരണകൂടം ക്രൈസ്​തവ വിശ്വാസ ആചാരങ്ങൾക്ക്​ നൽകിയ പിന്തുണയും സഹകരണവും ചടങ്ങിൽ അനുസ്​മരിക്കപ്പെട്ടു. ഇരുന്നൂറോളം സ്വദേശി ക്രിസ്​ത്യാനികളാണ്​ രാജ്യത്തുള്ളത്.