സ്വപ്‌നയ്ക്ക് സുരക്ഷ നല്‍കണമെന്ന് കോടതി

കൊച്ചി: സ്വര്‍ണക്കടത്ത് കേസ് പ്രതി സ്വപ്‌ന സുരേഷിന് സുരക്ഷ നല്‍കണമെന്ന് ജയില്‍ വകുപ്പ് മേധാവിയോട് കോടതി. സംരക്ഷണം ആവശ്യപ്പെട്ട് സ്വപ്‌ന നല്‍കിയ അപേക്ഷയിലാണ് നിര്‍ദേശം. നവംബര്‍ 25ന് മുന്‍പ് പലതവണ ഭീഷണിയുണ്ടായതായി സ്വപ്‌ന അപേക്ഷയില്‍ പറയുന്നു.

സാമ്പത്തിക കുറ്റകൃത്യങ്ങള്‍ പരിഗണിക്കുന്ന എറണാകുളം അഡീഷണല്‍ ചീഫ് ജുഡീഷ്യല്‍ മജിസ്ട്രേറ്റ് കോടതിയിലാണ് തനിക്ക് ജീവന് ഭീഷണിയുണ്ടെന്നും സംരക്ഷണം വേണമെന്നും ചൂണ്ടിക്കാട്ടി സ്വപ്ന സുരേഷ് അപേക്ഷ നല്‍കിയത്. തിരുവനന്തപുരം അട്ടക്കുളങ്ങര ജയിലില്‍ റിമാന്‍ഡില്‍ കഴിയവെ തന്നെ പോലിസ് ഉദ്യോഗസ്ഥര്‍ എന്നു തോന്നിക്കുന്ന ചിലര്‍ കാണാന്‍ വന്നതായി സ്വപ്ന അപേക്ഷയില്‍ പറയുന്നു. സ്വര്‍ണക്കടത്ത് കേസുമായി ബന്ധപ്പെട്ട ഉന്നത വ്യക്തികളുടെ പേര് അന്വേഷണഏജന്‍സികളോട് വെളിപ്പെടുത്തരുതെന്നും അന്വേഷണ ഏജന്‍സിയുമായി സഹകരിക്കരുതെന്നും അവര്‍ തന്നോട് ആവശ്യപ്പെട്ടതായും സ്വപ്ന സുരേഷ് വ്യക്തമാക്കുന്നു.തന്നെ ജയിലിനുള്ളില്‍ വെച്ചും തന്റെ കുടുംബാംഗങ്ങളെ പുറത്ത് വെച്ചും ഇല്ലാതാക്കാന്‍ കഴിവുള്ളവരാണെന്ന് അവര്‍ തന്നെ ഭീഷണിപ്പെടുത്തിയതായും സ്വപ്ന സുരേഷ് പറഞ്ഞു.

തന്റെ മൊഴി ജുഡീഷ്യല്‍ മജിസ്ട്രേറ്റ് കോടതി രേഖപെടുത്തി, കസ്റ്റഡി കാലാവധി അവസാനിച്ചു.ഈ സാഹചര്യത്തില്‍ താന്‍ വീണ്ടും അതേ ജയിലിലേക്കാണ് തിരികെ പോകുന്നത്. ഉന്നത സ്വാധീനമുളള വ്യക്തികള്‍ ഇടപെട്ട് ജയിലില്‍ തനിക്ക് മാനസികവും ശാരിരീകവുമായി പീഡനം ഏല്‍പ്പിക്കാന്‍ സാധ്യതയുണ്ടെന്നും സ്വപ്ന സുരേഷ് ചൂണ്ടിക്കാട്ടുന്നു. ഈ സാഹചര്യത്തില്‍ ജെയിലില്‍ തനിക്ക് സംരക്ഷണം ഉറപ്പു വരുത്താന്‍ ഡിജിപിക്കും അട്ടക്കുളങ്ങര വനിതാ ജയില്‍സൂപ്രണ്ടിനും നിര്‍ദേശം നല്‍കുമെന്നും സ്വപ്ന സുരേഷ് കോടതിയില്‍ നല്‍കിയ അപേക്ഷയില്‍ ചൂണ്ടിക്കാട്ടി. തുടര്‍ന്നാണ് കോടതി സ്വപ്നയ്ക്ക് സുരക്ഷ നല്‍കാന്‍ ജയില്‍ ഡിജിപിക്ക് നിര്‍ദേശം നല്‍കിയത്.