ഓഹരി വിപണിയില്‍ ചാഞ്ചാട്ടം തുടരുമോ?

കെ.അരവിന്ദ്

പോയ വാരം നിഫ്റ്റി നേട്ടത്തോടെയാണ് ക്ലോസ് ചെയ്തത്. 90 പോയിന്റ് നേട്ടമാണ് ക്ലോസിംഗിന്റെ അടിസ്ഥാനത്തില്‍ ഒരാഴ്ച കൊണ്ട് നിഫ്റ്റിയിലുണ്ടായത്. പൊതുമേഖലാ ബാങ്ക്, ഓട്ടോ, ഇന്‍ഫ്രാ ഓഹരികളാണ് പൊതുവെ മുന്നേറ്റത്തില്‍ മുന്നില്‍ നിന്നത്. നിഫ്റ്റി 14,652.70 പോയിന്റ് വരെ ഉയര്‍ന്നതിനു ശേഷം ചാഞ്ചാട്ടം നേരിടുന്നതാണ് കണ്ടത്. ഇന്നലെ 14,500ന് മുകളിലായി ക്ലോസ് ചെയ്യുന്നതില്‍ നിഫ്റ്റി പരാജയപ്പെട്ടു.

നിഫ്റ്റി ഐടി സൂചിക ജനുവരിയില്‍ 12 ശതമാനമാണ് ഉയര്‍ന്നത്. ഒരു മാസത്തിനിടെ 10 ശതമാനം മുതല്‍ 35 ശതമാനം വരെയാണ് ഐടി ഓഹരികളുടെ വിലയില്‍ മുന്നേറ്റമുണ്ടായത്. ഡിജിറ്റല്‍വല്‍ക്കരണ കാലത്ത് ഐടി കമ്പനികളുടെ ബിസിനസില്‍ വലിയ കുതിപ്പാണ് ഉണ്ടായത്.

ഒക്ടോബര്‍-ഡിസംബര്‍ ത്രൈമാസത്തില്‍ പൊതുവെ ഐടി കമ്പനികള്‍ ഉയര്‍ന്ന വളര്‍ച്ചയാണ് കൈവരിച്ചത്. ഭാവി വരുമാന വളര്‍ച്ചാ സാധ്യതയും മികച്ച നിലയിലാണ്. ഓഹരി വിപണിയില്‍ ഐടി ഓഹരികള്‍ക്കുള്ള ഉയര്‍ന്ന ഡിമാന്റ് എല്ലാ അര്‍ത്ഥത്തിലും ശരിവെക്കുന്ന നിലയിലാണ് പ്രമുഖ ഐടി കമ്പനികളുടെ പ്രവര്‍ത്തന റിപ്പോര്‍ട്ടുകള്‍ പുറത്തുവന്നത്.

ബാങ്ക് നിഫ്റ്റി എക്കാലത്തെയും ഉയര്‍ന്ന നിലവാരത്തിലേക്ക് എത്തുന്നതാണ് പോയ വാരം കണ്ടത്. അതിനു ശേഷം വില്‍പ്പന സമ്മര്‍ദത്തിന് വിധേയമായി. ഇന്ന് പുറത്തുവരുന്ന എച്ച്ഡിഎഫ്സി ബാങ്കിന്റെ മൂന്നാം ത്രൈമാസഫലം നിര്‍ണായകമാകും. ബാങ്ക് നിഫ്റ്റിക്ക് 33,800ലാണ് അടുത്ത പ്രതിരോധമുള്ളത്. 31,7000ല്‍ താങ്ങുണ്ട്. നിഫ്റ്റിക്ക് 14,890ല്‍ ആണ് അടുത്ത പ്രതിരോധമുണ്ട്. 14,370ല്‍ ആണ് താങ്ങുള്ളത്. 14,370ന് മുകളില്‍ നിലനില്‍ക്കാനായില്ലെങ്കില്‍ ഓഹരി വിപണി തിരുത്തലിന്റെ ഘട്ടത്തിലേക്ക് കടക്കും.