കേരളത്തില്‍ സൗജന്യമായി കോവിഡ് വാക്സിന്‍ നല്‍കും: മുഖ്യമന്ത്രി

കോവിഡ് വാക്‌സിന്‍ ലഭ്യമായി തുടങ്ങിയാല്‍ കേരളത്തിലെ ജനങ്ങള്‍ക്ക് സൗജന്യമായി നല്‍കുമെന്ന് മുഖ്യമന്ത്രി പിണറായി വിജയന്‍ വാര്‍ത്താസമ്മേളനത്തില്‍ പറഞ്ഞു.

കേരളത്തില്‍ വാക്‌സിന്‍ സൗജന്യമായിരിക്കും. ആരില്‍ നിന്നും കാശ് ഈടാക്കാന്‍ സര്‍ക്കാര്‍ ഉദ്ദേശിക്കുന്നില്ലെന്നാണ് മുഖ്യമന്ത്രി പറഞ്ഞത്. കോവിഡ് പ്രതിരോധം സര്‍ക്കാരിന് നല്ല രീതിയില്‍ നടപ്പാക്കാനായത് ജനപിന്തുണകൊണ്ടാണെന്നും മുഖ്യമന്ത്രി പറഞ്ഞു.

കോവിഡ് കാലത്ത് പോലും ആരും പട്ടിണി കിടക്കരുതെന്ന പ്രതിജ്ഞാബദ്ധത സര്‍ക്കാരിനുണ്ടായിരുന്നു. വികസനവും ക്ഷേമപ്രവര്‍ത്തനങ്ങളും ഔദാര്യം അല്ല അവകാശമാണെന്ന രീതിയില്‍ തന്നെയാണ് ഇടത് പ്രസ്ഥാനങ്ങള്‍ കാണുന്നതെന്നും മുഖ്യമന്ത്രി പറഞ്ഞു.

കഴിഞ്ഞ നാലര വര്‍ഷം സംസ്ഥാന തലത്തില്‍ വികസപ്രവര്‍ത്തനങ്ങളുടെ കാര്യത്തില്‍ വന്‍ മുന്നേറ്റം ഉണ്ടായി. എന്നാല്‍ വികസന പദ്ധതികളില്‍ നിന്ന് ശ്രദ്ധതിരിക്കാന്‍ അപവാദങ്ങള്‍ പ്രചരിപ്പിക്കുകയാണെന്നും മുഖ്യമന്ത്രി കുറ്റപ്പെടുത്തി.