മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍ ആശുപത്രി വിട്ടു

ഭോപ്പാല്‍: കോവിഡ് ചികിത്സയിലായിരുന്ന മധ്യപ്രദേശ് മുഖ്യമന്ത്രി ശിവരാജ് സിങ് ആശുപത്രി വിട്ടു. ആശുപത്രി വിട്ടെങ്കിലും ഏഴ് ദിവസം വീട്ടില്‍ നിരീക്ഷണത്തില്‍ തുടരാന്‍ ഡോക്ടര്‍മാര്‍ നിര്‍ദേശിച്ചിട്ടുണ്ട്. കോവിഡ് സ്ഥിരീകരിച്ചതിനെ തുടര്‍ന്ന് ജൂലൈ 25 നാണ് ചൗഹാനെ ആശുപത്രിയില്‍ പ്രവേശിപ്പിച്ചത്.

ഭോപ്പാലിലെ ചിരായൂ ആശുപത്രിയിലായിരുന്നു അദ്ദേഹത്തെ ചികിത്സിച്ചിരുന്നത്. കോവിഡ് പ്രതിരോധ പ്രവര്‍ത്തകരെയെല്ലാം അഭിവാദ്യം ചെയ്തുകൊണ്ട് അദ്ദേഹം എല്ലാ മെഡിക്കല്‍ സ്റ്റാഫുകള്‍ക്കും നന്ദി അറിയിച്ചു. കോവിഡിനെ ആരും ഭയപ്പെടേണ്ടതില്ലെന്നും അതേസമയം കോവിഡിന്റെ കാര്യത്തില്‍ അശ്രദ്ധരാകരുതെന്നും മുഖ്യമന്ത്രി പറഞ്ഞു. കോവിഡിനെതിരെ പോരാടുന്നതിന് മാസ്‌ക്ക ധരിക്കുന്നതും സാമൂഹിക അകലം പാലിക്കുന്നതും ഏറ്റവും അത്യന്താപേക്ഷിതമാണെന്നും അവ എല്ലാവരും പാലിക്കണമെന്നും അദ്ദേഹം കൂട്ടിച്ചേര്‍ത്തു. രാജ്യത്ത് കോവിഡ് സ്ഥിരീകരിക്കുന്ന ആദ്യത്തെ മുഖ്യമന്ത്രിയായിരുന്നു ശിവരാജ് സിങ് ചൗഹാന്‍.