ത്രിതല പഞ്ചായത്തുകളില്‍ അധ്യക്ഷ തെരഞ്ഞെടുപ്പ് ഇന്ന്

തിരുവനന്തപുരം: സംസ്ഥാനത്തെ ജില്ലാ-ബ്ലോക്ക്-ഗ്രാമ പഞ്ചായത്തുകളില്‍ പ്രസിഡന്റുമാരെയും വൈസ് പ്രസിഡന്റുമാരെയും ഇന്ന് തെരഞ്ഞെടുക്കും. രാവിലെ 11 മണിക്കാണ് പ്രസിഡന്റ് തെരഞ്ഞെടുപ്പ്. വൈസ് പ്രസിഡന്റ് തെരഞ്ഞെടുപ്പ് ഉച്ചയ്ക്ക് നടക്കും.

7 ജില്ലാ പഞ്ചായത്തുകളുടെ പ്രസിഡന്റ് സ്ഥാനം വനിതാ സംവരണമാണ്. തിരുവനന്തപുരം ജില്ലാ പഞ്ചായത്ത് പ്രസിഡന്റ് സ്ഥാനം പട്ടികജാതി സംവരണവും. 941 ഗ്രാമ പഞ്ചായത്തുകളും 152 ബ്ലോക്ക് പഞ്ചായത്തുകളുമാണ് സംസ്ഥാനത്തുള്ളത്.

കക്ഷിനില തുല്യമായ പഞ്ചായത്തുകളില്‍ നറുക്കെടുപ്പിലൂടെ അമരക്കാരെ തെരഞ്ഞെടുക്കും. എല്‍ഡിഎഫിനും യുഡിഎഫിനും എട്ടുപേര്‍ വീതമുള്ള വയനാട് ജില്ലാ പഞ്ചായത്തില്‍ പ്രസിഡന്റ്, വൈസ് പ്രസിഡന്റ് സ്ഥാനങ്ങള്‍ നറുക്കെടുപ്പിലൂടെ തീരുമാനിക്കും.

അതേസമയം ആലപ്പുഴ ജില്ലാ പഞ്ചായത്ത് വൈസ് പ്രസിഡന്റ് സ്ഥാനത്തെ ചൊല്ലി സിപിഎം സിപിഐ തര്‍ക്കം നിലനില്‍ക്കുകയാണ്. കോട്ടയം ജില്ലാ പഞ്ചായത്തില്‍ പ്രസിഡന്റ് പദം ആദ്യ രണ്ടു വര്‍ഷം കേരള കോണ്‍ഗ്രസിന് നല്‍കാന്‍ ധാരണയായിട്ടുണ്ട്. കണ്ണൂര്‍ മുഴപ്പിലങ്ങാട് പഞ്ചായത്തില്‍ എസ്.ഡി.പി.ഐ വിട്ടുനിന്നാല്‍ മാത്രമേ ഇടതു മുന്നണിക്ക് അധികാരത്തില്‍ എത്താനാകൂ.

മലപ്പുറം ജില്ലാ പഞ്ചായത്തില്‍ വൈസ് പ്രസിഡന്റ് സ്ഥാനം വേണമെന്ന കോണ്‍ഗ്രസ് ആവശ്യം മുസ്ലിംലീഗ് തള്ളി. ഒരു സീറ്റിന്റെ വ്യത്യാസത്തില്‍ കാസര്‍കോട് ജില്ലാ പഞ്ചായത്ത് ഇടതു മുന്നണി നേടിയേക്കും.