കെ.എ.എസ് മൂല്യനിര്‍ണയത്തില്‍ അട്ടിമറിയെന്ന് ആരോപണം -ഉദ്യോഗാര്‍ഥികള്‍ ഹൈക്കോടതിയെ സമീപിച്ചു

തിരുവനന്തപുരം: കേരള അഡ്മിനിട്രേറ്റിവ് സര്‍വിസിന്റെ മൂല്യനിര്‍ണയത്തില്‍ അട്ടിമറി നടന്നതായി ആരോപണം. പണം അടച്ച് രണ്ടുമാസം കഴിഞ്ഞിട്ടും ഉത്തരക്കടലാസിന്റെ പകര്‍പ്പ് പി.എസ്.സി നല്‍കുന്നില്ലെന്ന് ചൂണ്ടിക്കാട്ടി ഉദ്യോഗാര്‍ഥികള്‍ ഹൈകോടതിയെ സമീപിച്ചു. കഴിഞ്ഞ ആഗസ്റ്റ് 26നാണ് കെ.എ.എസ് ഒന്നും രണ്ടും സ്ട്രീമിലേക്കുള്ള പ്രാഥമികപരീക്ഷ ഫലം പ്രസിദ്ധീകരിച്ചത്. പി.എസ്.സി പുറത്തിറക്കിയ ഉത്തരങ്ങളുമായി മികച്ച വിജയം കാത്തിരുന്നവര്‍ക്ക് നിരാശയായിരുന്നു ഫലം. 88-90ന് മുകളില്‍ മാര്‍ക്ക് പ്രതീക്ഷിച്ചവര്‍ കട്ട് ഓഫ് മാര്‍ക്ക് ലഭിക്കാതെ പുറത്തായി. ഇതോടെ ഒരുവിഭാഗം ഉത്തരക്കടലാസുകളുടെ പകര്‍പ്പ് ആവശ്യപ്പെട്ട് പി.എസ്.സിക്ക് അപേക്ഷ നല്‍കിയെങ്കിലും ഭൂരിഭാഗം പേര്‍ക്കും നല്‍കിട്ടില്ല. ലഭിച്ചവര്‍ക്കാകെട്ട മറ്റ് ചിലരുടെ ഉത്തരക്കടലാസുകളാണ് നല്‍കിയത്.

പ്രാഥമിക പരീക്ഷഫലം ആയതിനാല്‍ കെ.എ.എസിന് 15 ദിവസത്തെ പുനഃപരിശോധന സമയമാണ് പി.എസ്.സി അനുവദിച്ചത്. മാര്‍ക്കുകള്‍ കണക്കാക്കിയത് ശരിയാണോയെന്ന് പരിശോധിക്കുന്നതിന് 85 രൂപയും ഉത്തരക്കടലാസിന്റെ പകര്‍പ്പിന് ഒരു പേപ്പറിന് 335 രൂപയുമാണ് ഈടാക്കിയത്. പണം ട്രഷറിയിലടച്ച് ചെലാന്‍ സഹിതം അപേക്ഷിക്കണമെന്നായിരുന്നു നിര്‍ദേശം. ഓണാവധിയും കോവിഡ് നിയന്ത്രണങ്ങളും ഉള്ളതിനാല്‍ പണം അടക്കാനും അപേക്ഷ നല്‍കാനും ബുദ്ധിമുണ്ടെന്ന് ഉദ്യോഗാര്‍ഥികള്‍ അറിയിച്ചെങ്കിലും തീയതി ദീര്‍ഘിപ്പിക്കാന്‍ കമീഷന്‍ തയാറായില്ല. കെ.എ.എസ് പരീക്ഷക്ക് വിതരണം ചെയ്ത ഒ.എം.ആര്‍ ഷീറ്റുകളില്‍ 17,000ത്തോളം ഉത്തരക്കടലാസുകള്‍ ഗുണനിലവാരമില്ലാത്തതിനെ തുടര്‍ന്ന് മെഷീന്‍ പുറന്തള്ളിയിരുന്നു. തങ്ങള്‍ പൂരിപ്പിച്ച ഉത്തരങ്ങളല്ല ലഭിച്ച ഉത്തരക്കക്കടലാസില്‍ ഉള്ളതെന്ന് ചൂണ്ടിക്കാട്ടി രേഖാമൂലം ഉദ്യോഗാര്‍ഥികളില്‍ ചിലര്‍ ചെയര്‍മാന് പരാതി നല്‍കിയിട്ടും നടപടി ഉണ്ടായില്ല.