കേരളം കണ്ട വലിയ കള്ളനാണ് ഐസക്: കെ സുരേന്ദ്രന്‍

തിരുവനന്തപുരം: സി എ ജി റിപ്പോര്‍ട്ടുമായി ബന്ധപ്പെട്ട് തോമസ് ഐസക് നടത്തിയ പ്രതികരണത്തെ  വിമര്‍ശിച്ച് ബിജെപി സംസ്ഥാന അധ്യക്ഷന്‍ സുരേന്ദ്രന്‍. തോമസ് ഐസക് സത്യപ്രതിജ്ഞാലംഘനം നടത്തി. മന്ത്രി പച്ചക്കള്ളം പരസ്യമായി പറയുന്നു. കേരളം കണ്ട വലിയ കള്ളനാണ് ഐസക് എന്നും കെ സുരേന്ദ്രന്‍ പറഞ്ഞു.

സിഎജി റിപ്പോര്‍ട്ട് അന്തിമമാണോ കരടാണോ എന്നു പറഞ്ഞ് പുകമറ സൃഷ്‌ടിക്കരുതെന്ന്  തോമസ് ഐസക്ക് പറഞ്ഞിരുന്നു.കിഫ്‌ബി വായ്‌പ്പകള്‍ ഓഫ് ബഡ്‌ജറ്റ് വായ്‌പകളല്ല. അത് ഇന്ത്യയില്‍ കേന്ദ്ര സംസ്ഥാന സര്‍‌ക്കാരുകള്‍ ചെയ്യുന്നുണ്ട്. ഇതൊക്കെ സംസ്ഥാന സര്‍ക്കാരിന്റെ പ്രത്യക്ഷ ബാദ്ധ്യതകല്ല. ഉത്തമ ബോദ്ധ്യത്തിന്റെ അടിസ്ഥാനത്തിലാണ് താന്‍ കരട് റിപ്പോര്‍ട്ടെന്ന് പറഞ്ഞത്. കിഫ്‌ബിക്ക് തനത് വരുമാനമില്ല. സി എ ജി ഓഡിറ്റ് നടത്തിയ സമയത്ത് കിഫ്‌ബി ആകെ വായ്‌പയെടുത്തത് മുവായിരത്തില്‍പ്പരം കോടി രൂപയാണ്. ഒരു ഘട്ടത്തിലും സര്‍ക്കാരുമായി ആലോചിക്കാതെ ഏകപക്ഷീയമായ തീരുമാനം അടിച്ചേല്‍പ്പിക്കുകയാണെന്നും തോമസ് ഐസക്ക് വ്യക്തമാക്കുകയുണ്ടായി.

അടിസ്ഥാനരഹിതമായ ആരോപണങ്ങളും നിഗമനങ്ങളുമാണ് സി എ ജി ഉയര്‍ത്തുന്നത്. കേരളത്തിന്റെ വികസനത്തെ ശ്വാസം മുട്ടിക്കുകയാണ്. മസാല ബോണ്ടിന് ആര്‍ ബി ഐ അനുമതിയുണ്ട്. ഭരണഘടനപരമായി മസാല ബോണ്ടിന് യാതൊരു പ്രശ്‌നവുമില്ല. കേരളത്തിനെതിരെ വലിയ ഗൂഢാലോചനയാണ് നടക്കുന്നത്. എ ജി പോലും എഴുതാത്ത കാര്യമാണ് ഡല്‍ഹിയില്‍ നിന്ന് കൂട്ടിച്ചേര്‍ത്തത്. സംസ്ഥാന സര്‍ക്കാരിനെ ഒരു കാര്യവും അറിയിക്കാതെയാണ് നിയമസഭയില്‍ വയ്‌ക്കാന്‍ വേണ്ടി റിപ്പോര്‍ട്ട് നല്‍കിയതെന്നും തോമസ് ഐസക്ക് പറഞ്ഞു.